ലണ്ടന്‍ : ബ്രസീല്‍ സ്‌ട്രൈക്കര്‍ ഗബ്രിയേൽ മാർട്ടിനെല്ലി പ്രീമിയർ ലീഗ് ടോപ്പേഴ്‌സായ ആഴ്‌സണലില്‍ തുടരും. 21കാരനുമായുള്ള കരാര്‍ പുതുക്കിയതായി ആഴ്‌സണല്‍ അറിയിച്ചു. 2027 വരെ നീണ്ടുനിൽക്കുന്നതാണ് പുതിയ കരാര്‍.
ആവശ്യമെങ്കില്‍ 12 മാസത്തേക്ക് കൂടി ദീര്‍ഘിപ്പിക്കാന്‍ കഴിയുന്ന തരത്തിലുള്ളതാണ് പുതിയ കരാര്‍. 2022 ഖത്തറിൽ നടന്ന ഫിഫ ലോകകപ്പിൽ ബ്രസീലിനെ പ്രതിനിധീകരിച്ച മാർട്ടിനെല്ലി സീസണില്‍ മിന്നും ഫോമാണ് തുടരുന്നത്. പ്രീമിയര്‍ ലീഗില്‍ ക്ലബ്ബിന്‍റെ 19 മത്സരങ്ങളിലും സ്റ്റാര്‍ട്ടിങ്‌ ഇലവനില്‍ സാന്നിധ്യം നേടാന്‍ താരത്തിന് കഴിഞ്ഞിരുന്നു.
സീസണില്‍ വിവിധ ടൂര്‍ണമെന്‍റുകളിലായി ഇതേവരെ 27 മത്സരങ്ങളില്‍ ക്ലബ്ബിനായി കളത്തിലിറങ്ങിയ താരം ഏഴ്‌ ഗോളുകളും മൂന്ന് അസിസ്‌റ്റുകളും നേടിയിട്ടുണ്ട്. മാർട്ടിനെല്ലിയുമായി പുതിയ ദീർഘകാല കരാറിൽ ഒപ്പുവച്ചതില്‍ സന്തോഷമുണ്ടെന്ന് ആഴ്‌സണല്‍ പരിശീലകന്‍ മൈക്കൽ അർട്ടെറ്റ ക്ലബ്ബിന്‍റെ ഔദ്യോഗിക വെബ്‌സൈറ്റിനോട് പറഞ്ഞു.
'ഏറെ കഠിനാധ്വാനം ചെയ്യുന്ന മാർട്ടിനെല്ലി മികച്ച ഗുണനിലവാരവും ഊർജവുമുള്ള താരമാണ്. വളരെ ചെറുപ്പമായ അവനില്‍ നിന്നും ഇനിയും ഏറെ കാര്യങ്ങള്‍ വരാനുണ്ട്. അവനോടൊപ്പം ഒന്നിച്ച് യാത്ര ചെയ്യുന്നത് വളരെ സന്തോഷകരമാണ്.