ദോഹ : ഖത്തര്‍ ലോകകപ്പില്‍ ദക്ഷിണ കൊറിയന്‍ സ്വപ്‌നങ്ങളെ തകര്‍ത്ത് ബ്രസീല്‍ ക്വാര്‍ട്ടറില്‍. പ്രീ ക്വാര്‍ട്ടറില്‍ ഒന്നിനെതിരെ നാല് ഗോളിനാണ് കാനറിപ്പടയുടെ വിജയം. ക്വാര്‍ട്ടറില്‍ ജപ്പാനെ ഷൂട്ടൗട്ടില്‍ മറികടന്നെത്തുന്ന ക്രൊയേഷ്യയാണ് മഞ്ഞപ്പടയുടെ എതിരാളി.
അട്ടിമറി സ്വപ്‌നവുമായി സ്‌റ്റേഡിയം 974ല്‍ ഇറങ്ങിയ ദക്ഷിണ കൊറിയയെ ടിറ്റെയുടെ കുട്ടികള്‍ നിലം തൊടാന്‍ അനുവദിച്ചില്ല. തുടക്കം മുതല്‍ ആക്രമണം അഴിച്ചുവിട്ട ലാറ്റിന്‍ അമേരിക്കന്‍ സംഘം ആദ്യ പകുതിയില്‍ തന്നെയാണ് നാല് ഗോളും എതിര്‍ വലയിലെത്തിച്ചത്. വിനീഷ്യസ് ജൂനിയര്‍ തുടക്കമിട്ട ഗോള്‍ വേട്ട നെയ്‌മര്‍, റിച്ചാര്‍ലിസണ്‍, ലൂയിസ് പക്വെറ്റ എന്നിവരിലൂടെയാണ് അവസാനിച്ചത്. മറുവശത്ത് രണ്ടാം പകുതിയില്‍ പൈക് സിയുങ് ഹോയാണ് ഏഷ്യന്‍ പടക്കുതിരകള്‍ക്കായി ആശ്വാസ ഗോള്‍ നേടിയത്.
നാലടിച്ച് നാലുപേര്‍ :കാല്‍പ്പന്ത് കളിയുടെ മനോഹാരിത ലോകത്തിന് മുന്നില്‍ കാഴ്‌ചവയ്ക്കുന്ന പ്രകടനമാണ് കൊറിയക്കെതിരെ ബ്രസീല്‍ പുറത്തെടുത്തത്. വിജയത്തില്‍ കുറഞ്ഞൊന്നും പ്രതീക്ഷിക്കാത്തത് കൊണ്ട് ഇരുകൂട്ടരും തുടക്കം മുതല്‍ തന്നെ ആക്രമണം അഴിച്ചുവിട്ടു. അതില്‍ മത്സരത്തിന്‍റെ ആദ്യ മിനിട്ടുകളില്‍ തന്നെ കാനറിപ്പട വിജയിക്കുകയും ചെയ്‌തു.
ഏഴാം മിനിട്ടിലാണ് മത്സരത്തിലെ ആദ്യ ഗോള്‍ പിറന്നത്. സൂപ്പര്‍ താരം വിനീഷ്യസ് ജൂനിയറാണ് ബ്രസീലിന് ലീഡ് സമ്മാനിച്ചത്. റാഫീന്യയുടെ മുന്നേറ്റത്തില്‍ നിന്നായിരുന്നു ഗോള്‍.
പന്തുമായി വലതുവിങ്ങിലൂടെ കുതിച്ച റഫീന്യ നല്‍കിയ ക്രോസ് ബോക്‌സിലെ കൂട്ടിയിടികള്‍ക്കൊടുവില്‍ ചെന്നെത്തിയത് ആരാലും മാര്‍ക്ക് ചെയ്യപ്പെടാതെ നിന്നിരുന്ന വിനീഷ്യസ് ജൂനിയറിന്‍റെ കാലുകളില്‍. കിട്ടിയ അവസരം മുതലെടുത്ത റയല്‍ മാഡ്രിഡിന്‍റെ ബ്രസീലിയന്‍ താരം തകര്‍പ്പന്‍ ഫിനിഷിങ്ങിലൂടെ പന്ത് ലക്ഷ്യത്തിലെത്തിച്ചു. ആദ്യ ഗോളിന്‍റെ ചൂടാറും മുന്‍പ് തന്നെ മഞ്ഞപ്പട രണ്ടാം ഗോളുമടിച്ചു.
പരിക്കില്‍ നിന്ന് മുക്തനായി തിരികെയെത്തിയ സൂപ്പര്‍താരം നെയ്‌മറിന്‍റെ വകയായിരുന്നു രണ്ടാം ഗോള്‍. റിച്ചാര്‍ലിസണെ ബോക്‌സിനുള്ളില്‍ വീഴ്‌ത്തിയതിന് ബ്രസീലിന് അനുകൂലമായി റഫറി പെനാല്‍റ്റി വിധിച്ചു. പത്താം മിനിട്ടില്‍ കിക്കെടുത്ത നെയ്‌മര്‍ ഗോള്‍ കീപ്പറെ കാഴ്‌ചക്കാരനാക്കി അനായാസം പന്ത് വലയിലേക്ക് തട്ടിയിട്ടു.
ആദ്യ 15 മിനിട്ടിനുള്ളില്‍ തന്നെ രണ്ട് ഗോള്‍ വഴങ്ങിയതോടെ തിരിച്ചടി നല്‍കാനുള്ള ശ്രമങ്ങള്‍ ദക്ഷിണ കൊറിയയും നടത്തിക്കൊണ്ടേയിരുന്നു. 16ാം മിനിട്ടില്‍ ഹവാങ് ഹീ ചാന്‍റെ തകര്‍പ്പനൊരു ലോങ് റേഞ്ചര്‍ ഷോട്ട് ബ്രസീല്‍ ഗോള്‍ അലിസണ് കീപ്പര്‍ അത്‌ഭുതകരമായി തട്ടിയകറ്റി. രണ്ട് ഗോളടിച്ചിട്ടും മൂര്‍ച്ച കുറയാതെയുള്ള മുന്നേറ്റങ്ങളായിരുന്നു കാനറിപ്പട നടത്തിക്കൊണ്ടിരുന്നത്.