ലണ്ടന്‍ : എഫ്‌എ കപ്പ് കിരീടം നിലനിര്‍ത്താനുള്ള പ്രതീക്ഷകള്‍ സജീവമാക്കി ലിവര്‍പൂള്‍. വോള്‍വ്സിനെ റീപ്ലേയില്‍ തോല്‍പ്പിച്ച ലിവര്‍പൂള്‍ നാലാം റൗണ്ടിലേക്ക് മുന്നേറി. വോള്‍വ്സിന്‍റെ തട്ടകത്തില്‍ നടന്ന മത്സരത്തില്‍ ഏകപക്ഷീയമായ ഒരു ഗോളിനാണ് ചെമ്പട വിജയം പിടിച്ചത്.
യുവതാരം ഹാർവി എലിയറ്റാണ് ലിവര്‍പൂളിന്‍റെ വിജയ ഗോള്‍ നേടിയത്. നേരത്തെ ആന്‍ഫീല്‍ഡില്‍ നടന്ന മൂന്നാം റൗണ്ട് മത്സരത്തില്‍ ഇരു ടീമുകളും 2-2ന് സമനില പാലിച്ചിരുന്നു. ഇതോടെയാണ് വോള്‍വ്സിന്‍റെ തട്ടകത്തില്‍ വച്ച് റീപ്ലേ നടത്തിയത്.
ആൻഫീൽഡിൽ കളിച്ച ടീമില്‍ നിന്നും രണ്ട് മാറ്റങ്ങളുമായാണ് വോള്വ്സ് ഇറങ്ങിയിരുന്നത്. എന്നാല്‍ അടിമുടി മാറിയാണ് ലിവര്‍പൂള്‍ കളിച്ചത്. ഇബ്രാഹിമ കൊനാറ്റെ , തിയാഗോ, കോഡി ഗാക്‌പോ എന്നിവർ മാത്രം തുടര്‍ന്നപ്പോള്‍ മുഹമ്മദ് സലായടക്കമുള്ള പ്രധാന താരങ്ങളെ ക്ലോപ്പ് ബഞ്ചിലിരുത്തി.