ലണ്ടന്‍ : ഇംഗ്ലീഷ് പ്രീമിയര്‍ ലീഗില്‍ മാഞ്ചസ്റ്റര്‍ യുണൈറ്റഡിന് നാണം കെട്ട തോല്‍വി. ഏകപക്ഷീയമായ നാല് ഗോളുകള്‍ക്ക് ബ്രൈറ്റനാണ് യുണൈറ്റഡിനെ തകര്‍ത്തത്. സ്വന്തം തട്ടകമായി അമെക്‌സ് സ്റ്റേഡിയത്തില്‍ കയ്സെടോ (15ാം മിനിട്ട്), കുകുരെല (49ാംമിനിട്ട്), പാക്സല്‍ ഗ്രോബ്(57ാം മിനിട്ട്), ലിയഡ്രോ ട്രോസര്‍ഡ് (60ാം മിനിട്ട്) എന്നിവരാണ് ബ്രൈറ്റനായി ഗോള്‍ നേടിയത്.
മത്സരത്തിന്‍റെ 58 ശതമാനവും പന്ത് കൈവശംവച്ചുവെങ്കിലും യുണൈറ്റഡിന് ഗോള്‍ നേടാനായില്ല. ലീഗില്‍ ഒരു മത്സരം മാത്രം ശേഷിക്കെ നിലവില്‍ 6ാം സ്ഥാനത്താണ് യുണൈറ്റഡ്. 37 മത്സരങ്ങളില്‍ 58 പോയിന്‍റാണ് സംഘത്തിനുള്ളത്. 36 മത്സരങ്ങളില്‍ 11 വിജയങ്ങളുള്ള ബ്രൈറ്റന്‍ 49 പോയിന്‍റുമായി ഒമ്പതാം സ്ഥാനത്താണ്.
ലിവര്‍പൂളിന് തിരിച്ചടി : പ്രീമിയര്‍ ലീഗില്‍ കിരീടപ്പോരാട്ടം കനക്കവെ ടോട്ടനം ഹോട്‌സ്പറിനെതിരേ സമനില വഴങ്ങിയത് ലിവര്‍പൂളിന് തിരിച്ചടിയായി. ഓരോ ഗോള്‍ വീതം നേടിയാണ് ഇരു സംഘവും സമനിലയില്‍ പിരിഞ്ഞത്. ഗോള്‍ രഹിതമായ ആദ്യപകുതിക്ക് ശേഷം ടോട്ടനമാണ് ആദ്യം ഗോള്‍ നേടിയത്.
also read: പ്രീ സീസണ്‍ യൂറോപ്പിൽ; സൗഹൃദ മത്സരങ്ങൾ കൊച്ചിൽ; കപ്പടിക്കാനുറച്ച് ബ്ലാസ്റ്റേഴ്‌സ്
56ാം മിനിട്ടില്‍ സണ്‍ ഹ്യുങ് മിന്നായിരുന്നു ഗോള്‍ നേടിയത്. 74ാം മിനിട്ടില്‍ ലൂയിസ് ഡയസിലൂടെയാണ് ലിവര്‍പൂള്‍ സമനില നേടിയത്. 35 മത്സരത്തില്‍ നിന്ന് 83 പോയിന്‍റുളള ലിവര്‍പൂള്‍ നിലവില്‍ ഒന്നാം സ്ഥാനത്താണ്. എന്നാല്‍ ഒരു മത്സരം കുറവ് കളിച്ച മാഞ്ചസ്റ്റര്‍ സിറ്റിക്കും 83 പോയിന്‍റുണ്ട്. 35 മത്സരങ്ങളില്‍ 62 പോയിന്‍റുമായി അഞ്ചാം സ്ഥാനത്താണ് ടോട്ടനം.
