ബര്‍മിങ്‌ഹാം: കോമണ്‍വെല്‍ത്ത് ഗെയിംസ് മിക്‌സഡ് ഡബിള്‍സ് ടേബിള്‍ ടെന്നിസില്‍ ഇന്ത്യയ്‌ക്ക്‌ സ്വര്‍ണം. ശ്രീജ അകുല-ശരത് കമല്‍ സഖ്യമാണ് സ്വര്‍ണം നേടിയത്. ഫൈനലില്‍ മലേഷ്യയുടെ ചൂങ്‌ - കാരെൻ ലിന്‍ സഖ്യത്തെയാണ് ഇന്ത്യന്‍ താരങ്ങള്‍ തോല്‍പ്പിച്ചത്. ഒന്നിനെതിരെ മൂന്ന് സെറ്റുകള്‍ക്കാണ് അകുല-ശരത് സഖ്യം ജയിച്ച് കയറിയത്.
ആദ്യ സെറ്റ്‌ അനായാസം സ്വന്തമാക്കിയ ഇന്ത്യന്‍ സഖ്യത്തിന് രണ്ടാം സെറ്റില്‍ കാലിടറി. തുടര്‍ന്നുള്ള രണ്ട് സെറ്റുകളും വിജയിച്ചാണ് ഇന്ത്യ മത്സരം പിടിച്ചത്. സ്‌കോര്‍: 11-4, 9-11, 11-5, 11-6. 40കാരനായ ശരത്തിന്‍റെ കരിയറിൽ ഇതാദ്യമായാണ് മിക്‌സഡ് ഡബിള്‍സിൽ ഒരു സ്വര്‍ണ മെഡൽ നേടുന്നത്. ഗെയിംസില്‍ ഇന്ത്യയുടെ 18-ാം സ്വര്‍ണ നേട്ടമാണിത്.