മാഡ്രിഡ് :ഇംഗ്ലീഷ് ക്ലബ് മാഞ്ചസ്റ്റര്‍ യുണൈറ്റഡുമായുള്ള കരാര്‍ അവസാനിപ്പിച്ചതിന് പിന്നാലെ സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ ക്ലബ് ഫുട്‌ബോള്‍ കരിയര്‍ ഭാവി എന്താകുമെന്ന ആകാംക്ഷയിലാണ് ആരാധകര്‍. ലോകകപ്പ് ക്വാര്‍ട്ടറില്‍ മൊറോക്കോയോട് പോര്‍ച്ചുഗല്‍ ടീം തോല്‍വി വഴങ്ങിയതിനെ തുടര്‍ന്ന് ജന്മനാട്ടില്‍ തിരികെയെത്തിയിരുന്നു താരം. പിന്നാലെ സ്‌പെയിനിലേക്കെത്തിയ റോണോ കഴിഞ്ഞ ദിവസം തന്‍റെ മുന്‍ ക്ലബ്ബായ റയല്‍ മാഡ്രിഡിന്‍റെ ട്രെയിനിങ് ക്യാമ്പില്‍ പരിശീലനം നടത്തി.
മാഡ്രിഡിലെ വാല്‍ദെബെബാസ് ക്യാമ്പിലാണ് പോര്‍ച്ചുഗല്‍ സൂപ്പര്‍ താരം പരിശീലനത്തിനിറങ്ങിയത്. ഇതോടെ താരം തന്‍റെ മുന്‍ ക്ലബ്ബിലേക്ക് മടങ്ങി എത്തുമോ എന്നുള്ള ചര്‍ച്ചകള്‍ക്കും ആരാധകര്‍ സമൂഹമാധ്യമങ്ങളില്‍ തുടക്കമിട്ടിട്ടുണ്ട്. എന്നാല്‍ റൊണാള്‍ഡോയോ ടീമോ ഇത് സംബന്ധിച്ച് ഔദ്യോഗിക പ്രതികരണങ്ങളൊന്നും നടത്തിയിട്ടില്ല.