റിയാദ് : അല്‍ നസറിന്‍റെ രക്ഷകനായി വീണ്ടും സൂപ്പർതാരം ക്രിസ്റ്റ്യാനോ റൊണാള്‍ഡോ. സൗദി പ്രോ ലീഗില്‍ അല്‍ തായിയ്‌ക്കെതിരായ മത്സരത്തിൽ ഒരു ഗോളും ഒരു അസിസ്റ്റുമായാണ് റൊണാള്‍ഡോ വീണ്ടും നായകപരിവേഷമണിഞ്ഞത് (Cristiano Ronaldo Scores And Assists). താരത്തിന്‍റെ ഈ പ്രകടനത്തിന്‍റെ മികവിൽ ഒന്നിനെതിരായ രണ്ട് ഗോളുകൾക്കാണ് അൽ നസർ ജയം നേടിയത്. 87-ാം മിനിറ്റിലാണ് റൊണാള്‍ഡോ അല്‍ നസറിന്‍റെ വിജയഗോള്‍ നേടിയത് (Al Taee vs Al Nassr Saudi Pro League updates).
സൗദിയിലെ പ്രിന്‍സ് അബ്‌ദുൽ അസീസ് ബിന്‍ മുസൈദ് സ്റ്റേഡിയത്തില്‍ നടന്ന മത്സരത്തില്‍ അല്‍ നസറാണ് ആദ്യം മുന്നിലെത്തിയത്. 32-ാം മിനിറ്റിൽ റൊണാള്‍ഡോ ഒരുക്കി നൽകിയ അവസരത്തിൽ നിന്ന് ബ്രസീലിയൻ താരം ടാലിസ്‌കയാണ് അല്‍ നസറിന് മുൻതൂക്കം സമ്മാനിച്ചത്. തുടർന്നും അല്‍ നസര്‍ അവസരങ്ങൾ സൃഷ്‌ടിച്ചെങ്കിലും ലീഡ് ഉയർത്താൻ സാധിച്ചില്ല.
രണ്ടാം പകുതിയില്‍ കൂടുതൽ മുന്നേറ്റങ്ങൾ നടത്തിയ അല്‍ തായ് സമനില ഗോള്‍ കണ്ടെത്തി. 79-ാം മിനിറ്റിൽ വിര്‍ജില്‍ മിസിദാനിലൂടെയാണ് ആതിഥേയര്‍ കളിയിലേക്ക് തിരികെവന്നത്. എന്നാല്‍ മത്സരങ്ങൾ സമനലയിൽ കലാശിക്കുമെന്ന് തോന്നിപ്പിച്ച സാഹചര്യത്തിലാണ് അല്‍ നസറിന്‍റെ രക്ഷകനായി ക്രിസ്റ്റ്യാനോ റൊണാള്‍ഡോ അവതരിച്ചത്.