ദോഹ: പോര്‍ച്ചുഗള്‍ സൂപ്പര്‍ താരം ക്രിസ്റ്റ്യാനോ റൊണാള്‍ഡോയുടെ സൗദി അങ്ങേറ്റം വ്യാഴാഴ്ച (19.01.23) നടന്നേക്കും. സൗദി ക്ലബ് അൽ നാസ്‌റിലേക്ക് ചേക്കേറിയ താരം വ്യാഴാഴ്ച ഫ്രഞ്ച് ക്ലബ് പിഎസ്‌ജിക്കെതിരായ സൗഹൃദ മത്സരത്തിൽ കളിക്കുമെന്നാണ് റിപ്പോര്‍ട്ട്. ലോകകപ്പ് ജേതാവ് ലയണല്‍ മെസിയും കിലിയന്‍ എംബാപ്പെയും ഉള്‍പ്പെടുന്ന പിഎസ്‌ജിക്കെതിരെ സൗദി ലീഗിലെ രണ്ട് ക്ലബ്ബുകളില്‍ നിന്നുള്ള കളിക്കാരെ ഉള്‍പ്പെടുത്തിയുള്ള ഓള്‍ സ്റ്റാര്‍ ഇലവനിന്‍റെ നായകനായാവും 37കാരനായ ക്രിസ്റ്റ്യാനോ കളത്തിലിറങ്ങുക.
സൗദിയിലെ പ്രമുഖ ക്ലബ്ബുകളായ അല്‍ നസ്‌റിന്‍റെയും അല്‍ ഹിലാലിന്‍റെയും മുന്‍ നിര താരങ്ങളടങ്ങിയ ടീമാണ് ക്രിസ്റ്റ്യാനോയ്‌ക്ക് കീഴില്‍ ഇറങ്ങുന്നത്. ഖത്തര്‍ ലോകകപ്പില്‍ അര്‍ജന്‍റീനയ്‌ക്കെതിരെ ഗോളടിച്ച സൗദി താരം സലേം അല്‍ ദസൗരിയും സൗദ് അബ്ദുള്‍ഹമീദും ഓള്‍സ്റ്റാറിനായി കളത്തിലിറങ്ങും. റിയാദിലാണ് മത്സരം നടക്കുക.