മാഞ്ചസ്റ്റര്‍: മാഞ്ചസ്റ്റര്‍ യുണൈറ്റഡിന്‍റെ പരിശീലന മൈതാനത്ത് തിരിച്ചെത്തി സൂപ്പര്‍ താരം ക്രിസ്റ്റ്യാനോ റൊണാള്‍ഡോ. ക്ലബ് വിടുന്നതുമായി ബന്ധപ്പെട്ട അഭ്യൂഹങ്ങള്‍ക്കിടെയാണ് സൂപ്പര്‍ താരം മാഞ്ചസ്റ്ററില്‍ എത്തിയത്. ഏജന്‍റിനൊപ്പം എത്തിയ റൊണാള്‍ഡോ യുണൈറ്റഡിന്‍റെ പുതിയ പരിശീലകന്‍ എറിക് ടെന്‍ ഹാഗുമായി ചര്‍ച്ച നടത്തി.
പ്രീ സീസണ്‍ പര്യടനങ്ങളില്‍ നിന്ന് വിട്ടുനിന്ന ശേഷമാണ് റൊണാള്‍ഡോ യുണൈറ്റഡിനൊപ്പം ചേരുന്നത്. വ്യക്തിപരമായ കാരണങ്ങളാല്‍ തായ്‌ലന്‍ഡിലും ഓസ്‌ട്രേലിയയിലും നടന്ന പ്രീസീസണ്‍ ക്യാമ്പില്‍ നിന്നും താരത്തിന് അവധി അനുവദിച്ചതായി ക്ലബ് അറിയിച്ചിരുന്നു.
തിരിച്ചെത്തിയെങ്കിലും റൊണാള്‍ഡോ ടീമില്‍ തുടരുമോ എന്ന കാര്യത്തില്‍ ഇപ്പോഴും വ്യക്തത ആയിട്ടില്ല. യുണൈറ്റഡിന് പ്രീമിയര്‍ ലീഗിലേക്ക് യോഗ്യത നേടാനാവാത്തത് താരത്തെ നിരാശനാക്കുന്നുണ്ട്. ഇതോടെ പ്രീമിയര്‍ ലീഗില്‍ കളിക്കാന്‍ കഴിയുന്ന ടീമിന്‍റെ ഭാഗമാവാനാണ് താരം ശ്രമം നടത്തുന്നത്.
അതേസമയം രണ്ട് ഉപാധികള്‍ അംഗീകരിച്ചാല്‍ വരുന്ന സീസണില്‍ ലോണ്‍ അടിസ്ഥാനത്തില്‍ മറ്റൊരു ടീമില്‍ കളിക്കാന്‍ അനുവദിക്കാമെന്ന് യുണൈറ്റഡ് ക്രിസ്റ്റ്യാനോയെ അറിയിച്ചതായി റിപ്പോര്‍ട്ടുണ്ട്. നിലവിലെ കരാര്‍ ഒരു വര്‍ഷത്തേക്കെങ്കിലും പുതുക്കണമെന്നും ലോണ്‍ കാലാവധി കഴിഞ്ഞാല്‍ ടീമില്‍ തിരിച്ചെത്തണവുമെന്നതാണ് യുണൈറ്റഡിന്‍റെ ആവശ്യം.
എന്നാല്‍ റൊണാള്‍ഡോയെ ആര്‍ക്കും വിട്ടുകൊടുക്കില്ലെന്നും തന്‍റെ പദ്ധതികളില്‍ താരവും ഉണ്ടെന്നുമാണ് ടെന്‍ ഹാഗ് ആവര്‍ത്തിക്കുന്നത്. ഇറ്റാലിയന്‍ ക്ലബ് യുവന്‍റസില്‍ നിന്ന് രണ്ടുവര്‍ഷ കരാറിലാണ് റൊണാള്‍ഡോ യുണൈറ്റഡില്‍ തിരിച്ചെത്തിയത്.
