മാഡ്രിഡ് :സ്‌പാനിഷ് സൂപ്പര്‍ കപ്പിലെ തോല്‍വിയ്‌ക്ക് കോപ്പ ഡെല്‍ റേയില്‍ (Copa Del Rey) റയല്‍ മാഡ്രിഡിനോട് (Real Madrid) കണക്ക് തീര്‍ത്ത് അത്‌ലറ്റിക്കോ മാഡ്രിഡ് (Atletico Madrid). എക്‌സ്‌ട്രാ ടൈമിലേക്ക് നീണ്ട പോരാട്ടത്തില്‍ രണ്ടിനെതിരെ നാല് ഗോളുകള്‍ക്കാണ് അത്‌ലറ്റിക്കോയുടെ ജയം (ATM vs RMA Copa Del Rey Round Of 16). മത്സരത്തിന്‍റെ അധിക സമയത്ത് അന്‍റോയിന്‍ ഗ്രീസ്‌മാന്‍ (Antoine Griezmann), റോഡ്രിഗോ റിക്വെല്‍മെ (Rodrigo Riquelme) എന്നിവര്‍ നേടിയ ഗോളുകളാണ് അത്‌ലറ്റിക്കോ മാഡ്രിഡിന് ജയം ഒരുക്കിയത്.
സാമുവല്‍ ലിനോയും (Samuel Lino) അല്‍വാരോ മൊറാട്ടയുമാണ് (Alvaro Morata) അത്‌ലറ്റിക്കോയുടെ മറ്റ് സ്കോറര്‍മാര്‍. അത്‌ലറ്റിക്കോ മാഡ്രിഡ് ഗോള്‍ കീപ്പര്‍ ജാന്‍ ഒബ്ലക്കിന്‍റെ (Jan Oblak) സെല്‍ഫ് ഗോളും ജൊസേലുവിന്‍റെ (Joselu) ഗോളുമായിരുന്നു റയല്‍ അക്കൗണ്ടിലേക്ക് എത്തിയത്. ജയത്തോടെ കോപ്പ ഡെല്‍ റേയില്‍ ക്വാര്‍ട്ടര്‍ ഫൈനല്‍ ബര്‍ത്ത് ഉറപ്പിച്ച അത്‌ലറ്റിക്കോ മാഡ്രിഡ് സ്‌പാനിഷ് സൂപ്പര്‍ കപ്പ് ചാമ്പ്യന്മാര്‍ക്ക് പുറത്തേക്കുള്ള വഴിയാണ് തുറന്നത് (Real Madrid Knocked Out).
സിവിറ്റാസ് മെട്രോപൊളിറ്റന്‍ സ്റ്റേഡിയത്തില്‍ നടന്ന മത്സരത്തിന്‍റെ തുടക്കം മുതല്‍ തന്നെ ഇരു ടീമുകളും തകര്‍പ്പന്‍ മുന്നേറ്റങ്ങളാണ് നടത്തിയത്. 11-ാം മിനിട്ടില്‍ ജൂഡ് ബെല്ലിങ്‌ഹാമിന്‍റെ ഗോള്‍ശ്രമം ക്രോസ്ബാര്‍ തടഞ്ഞിട്ടു. പിന്നീട്, 21-ാം മിനിട്ടില്‍ റയലിന്‍റെ ഒന്നിന് പിറകെ ഓരോന്നായുള്ള നീക്കങ്ങള്‍ക്ക് അത്‌ലറ്റിക്കോ ഗോള്‍ കീപ്പര്‍ ജാന്‍ ഒബ്ലക്കിനെ മറികടക്കാനായതുമില്ല.
അതേസമയം, മറുവശത്തും ആക്രമണങ്ങള്‍ നടത്തിയ അത്‌ലറ്റിക്കോ മാഡ്രിഡ് മത്സരത്തിന്‍റെ 39-ാം മിനിട്ടില്‍ സാമുവല്‍ ലിനോയിലൂടെയാണ് ലീഡ് കണ്ടെത്തുന്നത്. റയല്‍ ഡിഫന്‍ഡര്‍ റൂഡിഗര്‍ ക്ലിയര്‍ ചെയ്‌ത പന്തായിരുന്നു ലിനോ ഗോളാക്കി മാറ്റിയത്. ഒന്നാം പകുതിയുടെ ഇഞ്ചുറി ടൈമില്‍ റയല്‍ അത്‌ലറ്റിക്കോയ്‌ക്കൊപ്പമെത്തി.