ചരിത്രത്തിലാദ്യം; ചെസ് ഒളിമ്പ്യാഡിന് വേദിയായി ഇന്ത്യ, ജൂലൈ 28ന് മഹാബലിപുരത്ത് തുടക്കം

റഷ്യൻ തലസ്ഥാനമായ മോസ്‌കോയിൽ വെച്ച് നടത്താനിരുന്ന മത്സരം റഷ്യ -യുക്രൈൻ യുദ്ധത്തിന്‍റെ സാഹചര്യത്തിലാണ് ഇന്ത്യയിൽ നടത്താൻ തീരുമാനിച്ചത്.

ചെന്നൈ: 44-ാമത് ചെസ് ഒളിമ്പ്യാഡിന് ജൂലൈ 28ന് മഹാബലിപുരത്ത് തുടക്കം. ചരിത്രത്തിലാദ്യമായാണ് ചെസ് ഒളിമ്പ്യാഡിന് ഇന്ത്യ വേദിയാകുന്നത്. ഇരുന്നൂറോളം രാജ്യങ്ങളിൽ നിന്നുള്ള ചെസ്‌ താരങ്ങൾ ടൂർണമെന്‍റിൽ പങ്കെടുക്കുമെന്നാണ് വിവരം. മഹാബലിപുരത്ത് സ്ഥിതി ചെയ്യുന്ന ഫോർ പോയിന്‍റ്സ് ബൈ ഷെറാട്ടണിലെ കൺവൻഷൻ സെന്‍ററാണ് പുതിയ വേദി.

റഷ്യൻ തലസ്ഥാനമായ മോസ്‌കോയിൽ വെച്ച് നടത്താനിരുന്ന മത്സരം റഷ്യ-യുക്രൈൻ യുദ്ധത്തിന്‍റെ സാഹചര്യത്തിലാണ് ഇന്ത്യയിലേക്ക് മാറ്റിയത്. റഷ്യയിൽ നിന്ന് വേദി മാറ്റാൻ തീരുമാനിച്ചതിന് പിന്നാലെ ടൂർണമെന്‍റിന് ആതിഥേയത്വം വഹിക്കാൻ താൽപര്യം പ്രകടിപ്പിച്ച് ഓൾ ഇന്ത്യ ചെസ് ഫെഡറേഷൻ ഒരു കോടി യുഎസ് ഡോളറിന്‍റെ ഗ്യാരന്‍റി സമർപ്പിച്ചിരുന്നു.

ടൂർണമെന്‍റിലെ ആദ്യ റൗണ്ട് മത്സരങ്ങൾ ജൂലൈ 29ന് ആരംഭിക്കും. ആകെ 11 റൗണ്ടുകളാകും ഉണ്ടാവുക. ഓഗസ്റ്റ് 9ന് അവസാന റൗണ്ട് മത്സരങ്ങൾ നടക്കും. അതിന് ശേഷം സമാപന ചടങ്ങുകൾ നടക്കുമെന്നും ഓൾ ഇന്ത്യ ചെസ് ഫെഡറേഷൻ സെക്രട്ടറിയും ഒളിമ്പ്യാഡ് ടൂർണമെന്‍റ് ഡയറക്‌ടറുമായ ഭരത് സിങ് ചൗഹാൻ പറഞ്ഞു.