അബുദാബി: ഫിഫ ക്ലബ് വേൾഡ് കപ്പിൽ ചെൽസി ചാമ്പ്യൻമാർ. ഫൈനലിൽ പാൽമിറാസിനെ ഒന്നിനെതിരെ രണ്ട് ഗോളുകൾക്കാണ് ചെൽസി പരാജയപ്പെടുത്തിയത്. ചെൽസിയുടെ ആദ്യത്തെ ഫിഫ ക്ലബ് വേൾഡ് കപ്പ് നേട്ടമാണിത്.
അധിക സമയം അവസാനിക്കാൻ മിനിട്ടുകൾ ശേഷിക്കെ കയ്‌ ഹവെർട്ട്‌സാണ് പെനാൽറ്റിയിലൂടെ ചെൽസിക്ക് വിജയ ഗോൾ സമ്മാനിച്ചത്. ഗോൾ രഹിതമായ ആദ്യ പകുതിക്ക് ശേഷം രണ്ടാം പകുതിയിലാണ് മത്സരത്തിന്‍റെ ഗോളുകൾ പിറന്നത്. 55-ാം മിനിട്ടിൽ സൂപ്പർ താരം റൊമേലു ലുക്കാക്കുവാണ് ചെൽസിക്കായി ആദ്യ ഗോൾ നേടിയത്.
എന്നാൽ തൊട്ട് പിന്നാലെ 64-ാം മിനിട്ടിൽ റാഫേൽ വെയ്‌ഗയിലൂടെ പാൽമിറാസ് തിരിച്ചടിച്ചു. രണ്ടാം പകുതിയിലും സമനില പാലിച്ചതോടെ മത്സരം അധിക സമയത്തിലേക്ക് നീങ്ങി.
അധിക സമയത്തിൽ ഇരു ടീമുകളും വിജയഗോളിനായി ശക്‌തമായി തന്നെ പോരാടി. എന്നാൽ മത്സരം തീരാൻ മൂന്ന് മിനിട്ടി ശേഷിക്കെ 117-ാം മിനിട്ടിൽ കയ്‌ ഹവെർട്ട്‌സിലൂടെ ചെൽസി വിജയഗോൾ നേടി മത്സരം പിടിച്ചെടുത്തു.
ALSO READ:ISL: നോർത്ത് ഈസ്റ്റിനെതിരെ വിജയം; രണ്ടാം സ്ഥാനത്തേക്ക് കുതിച്ച് എടികെ മോഹൻ ബഗാൻ
2012-ൽ ചെൽസി ഫിഫ ക്ലബ് ലോകകപ്പ് ഫൈനലിലെത്തിയെങ്കിലും ബ്രസീലിയൻ ടീമായ കൊറിന്ത്യൻസിനോട് 1-0 ന് പരാജയപ്പെട്ടിരുന്നു. കഴിഞ്ഞ വർഷം ഖത്തറിൽ നടന്ന അരങ്ങേറ്റത്തിൽ പാൽമിറാസ് നാലാം സ്ഥാനത്തായിരുന്നു. സെമിയിൽ മെക്‌സിക്കൻ ക്ലബായ ടൈഗ്രെസിനോട് 1-0 ന് പരാജയപ്പെട്ട അവർ മൂന്നാം സ്ഥാന മത്സരത്തിൽ ഈജിപ്‌ത് ക്ലബായ അൽ അഹ്ലിയോട് പെനാൽറ്റിയിൽ തോറ്റു.
