ലണ്ടന്‍: യുവേഫ ചാമ്പ്യന്‍സ് ലീഗ് പ്രീ ക്വാര്‍ട്ടറിലെ ആദ്യ പാദ മത്സരത്തിൽ നിലവിലെ ചാമ്പ്യന്മാരായ ചെല്‍സിക്ക് ജയം. ഫ്രഞ്ച് ലീഗ് ചാമ്പ്യൻമാരായ ഒളിംപിക് ലില്ലെയെ ഏകപക്ഷീയമായ രണ്ട് ഗോളിനാണ് ചെല്‍സി തോല്‍പ്പിച്ചത്. അതേസമയം വിയ്യറയല്‍ യുവന്‍റസിനെ സമനിലയില്‍ തളച്ചു.
ഫ്രഞ്ച് ചാമ്പ്യന്മാര്‍ക്കെതിരെ ചെല്‍സിയുടെ ഹോം ഗ്രൗണ്ടായ സ്റ്റാംഫോര്‍ഡ് ബ്രിഡ്‌ജില്‍ അനായാസ ജയമാണ് ചെല്‍സി സ്വന്തമാക്കിയത്. മത്സരത്തിലുടനീളം ചെല്‍സിയുടെ ആധിപത്യമായിരുന്നു. 8-ാം മിനിറ്റില്‍ ഹക്കീം സീയെച്ചിന്‍റെ കോര്‍ണറില്‍ നിന്നും ഹാവെര്‍ട്‌സാണ് ചെല്‍സിക്കായി ആദ്യ ഗോള്‍ നേടിയത്.
ഗോള്‍ നേടിയിട്ടും ചെല്‍സി ആക്രമണം തുടര്‍ന്നു. ആദ്യ പകുതിയില്‍ മറ്റൊരു ഗോള്‍ കൂടി നേടാന്‍ ചെല്‍സിക്ക് സാധിച്ചില്ല. 63-ാം മിനിറ്റില്‍ മധ്യനിരയില്‍ പന്തുമായി മുന്നേറി എന്‍ഗോളോ കാന്‍റെ നല്‍കിയ പാസ് യുഎസ് താരം പുലിസിച്ച് വലയിലെത്തിക്കുകയായിരുന്നു. മാര്‍ച്ച് 17ന് ലില്ലെയുടെ ഹോം ഗ്രൗണ്ടിലാണ് രണ്ടാംപാദ മത്സരം.