റിയോ ഡി ജനീറോ: ഫുട്‌ബോളില്‍ നിന്നും വിരമിച്ച അർജന്‍റൈൻ താരം കാർലോസ് ടെവസ് ഇനി പരിശീലക വേഷത്തില്‍. അര്‍ജന്‍റൈൻ പ്രീമിയര്‍ ലീഗ് ക്ലബ്ബായ റൊസാരിയോ സെന്‍ട്രലിനെയാണ് ടെവസ് പരിശീലിപ്പിക്കുക. ക്ലബും താരവും തമ്മിലുള്ള ചര്‍ച്ചകള്‍ അന്തിമ ഘട്ടത്തിലാണെന്നാണ് ലഭിക്കുന്ന വിവരം.
പരിശീലകനെന്ന നിലയില്‍ ടെവസിന്‍റെ ആദ്യ ചുമതലയാണിത്. പ്രമുഖ ഇംഗ്ലീഷ് ക്ലബുകള്‍ക്കും ഇറ്റാലിയന്‍ ക്ലബിനും വേണ്ടി കളിച്ച ടെവസ് ഈ മാസം ആദ്യമാണ് ഫുട്‌ബോളില്‍ നിന്നും വിരമിക്കല്‍ പ്രഖ്യാപിച്ചത്. തന്‍റെ ഒന്നാം നമ്പര്‍ ആരാധകനായിരുന്ന പിതാവ് മരിച്ചതിനാലും കളിയോടുള്ള അഭിനിവേശം കുറഞ്ഞതിനാലുമാണ് വിരമിക്കലെന്ന് പറഞ്ഞ ടെവസ്, പരിശീലകനാവാണ് ഇനി ശ്രമിക്കുകയെന്നും വ്യക്തമാക്കിയിരുന്നു.