ലണ്ടന്‍:കറബാവോ കപ്പ് നേട്ടത്തോടെ ഒരു പ്രധാന ടൂര്‍ണമെന്‍റില്‍ കിരീടത്തിനായുള്ള ആറ് വര്‍ഷത്തെ കാത്തിരിപ്പാണ് മാഞ്ചസ്റ്റര്‍ യുണൈറ്റഡ് അവസാനിപ്പിച്ചത്. വെംബ്ലി സ്റ്റേഡിയത്തില്‍ നടന്ന കലാശപ്പോരില്‍ ന്യൂകാസിലിനെ എതിരില്ലാത്ത രണ്ട് ഗോളിന് തോല്‍പ്പിച്ചാണ് യുണൈറ്റഡ് കിരീടം ഉയര്‍ത്തിയത്. കാസിമിറോ, മാര്‍ക്കസ് റാഷ്‌ഫോര്‍ഡ് എന്നിവരായിരുന്നു യുണൈറ്റഡിനായി ഗോളിച്ചത്.
ഇതിന് മുന്നെ 2017ല്‍ ഹോസെ മൗറീന്യോയ്‌ക്ക് കീഴില്‍ യൂറോപ്പ ലീഗ് കിരീടമായിരുന്നു യുണൈറ്റഡ് അവസാനമായി നേടിയത്. ഇതോടെ കറബാവോ കപ്പ് നേട്ടം തകര്‍ത്ത് യുണൈറ്റഡ് തകര്‍ത്ത് ആഘോഷിക്കുകയും ചെയ്‌തു. ഇതിന്‍റെ ഭാഗമായുള്ള പരിശീലകന്‍ എറിക് ടെന്‍ ഹാഗിന്‍റെ ഡാന്‍സ് സോഷ്യല്‍ മീഡിയ കീഴടക്കുകയാണ്.
ബ്രസീലിയന്‍ താരം അന്‍റണി, അര്‍ജന്‍റീനന്‍ താരം ലിസാന്‍ഡ്രോ മാര്‍ട്ടിനെസ് എന്നിവര്‍ക്കൊപ്പമായിരുന്നു എറിക് ടെന്‍ ഹാഗ് നൃത്തം ചെയ്‌തത്. നേരത്തെ ഡച്ച് ക്ലബ് അയാക്‌സില്‍ ടെന്‍ ഹാഗിന് കീഴില്‍ ഒന്നിച്ച് കളിച്ച താരങ്ങള്‍ കൂടിയാണ് അന്‍റണിയും മാര്‍ട്ടിനെസും. അയാക്‌സ് ഡച്ച് ചാമ്പ്യന്മാരായപ്പോള്‍ മൂവരും സമാന രീതിയില്‍ നൃത്തം ചെയ്‌തിരുന്നു.
ടെന്‍ ഹാഗ് കഴിഞ്ഞ വര്‍ഷം യുണൈറ്റഡിന്‍റെ പരിശീലകനായെത്തിയതിന് പിന്നാലെയാണ് ഇരുവരും ലണ്ടനിലെത്തുന്നത്. ടെന്‍ ഹാഗ് എത്തും മുമ്പ് റാൽഫ് റാംഗ്നിക്കിന് കീഴില്‍ കളിച്ച യുണൈറ്റഡ് പ്രീമിയർ ലീഗിൽ ആറാം സ്ഥാനത്തേക്ക് വീണിരുന്നു. എന്നാല്‍ ഈ സീസണില്‍ മികച്ച പ്രകടനമാണ് ക്ലബ് നടത്തുന്നത്. നിലവില്‍ മൂന്നാം സ്ഥാനത്താണ് യുണൈറ്റഡ്. 24 മത്സരങ്ങളില്‍ നിന്നും 49 പോയിന്‍റുമാണ് മുന്‍ ചാമ്പ്യന്മാര്‍ക്കുള്ളത്.
ആദ്യ പകുതിയില്‍ തന്നെ ഇരട്ട പ്രഹരം:ന്യൂകാസിലിനെതിരായ മത്സരത്തിന്‍റെ ആദ്യ പകുതിയിലാണ് യുണൈറ്റഡ് രണ്ട് ഗോളുകളും നേടിയത്. 33-ാം മിനിട്ടില്‍ കാസിമിറോയാണ് സംഘത്തിനായി ആദ്യം ലക്ഷ്യം കണ്ടത്. ലൂക്ക് ഷായുടെ അസിസ്റ്റില്‍ നിന്നായിരുന്നു മധ്യനിര താരത്തിന്‍റെ ഗോള്‍ നേട്ടം.