ക്യാംമ്പ് നൗ: യൂറോപ്പ ലീഗ് ക്വാർട്ടിറിൽ ഫ്രാങ്ക്ഫർട്ടിനോട് പരാജയപ്പെട്ടതിന് പിന്നാലെ സ്‌പാനിഷ്‌ ലീഗിലും ബാഴ്‌സലോണയ്‌ക്ക് തിരിച്ചടി. ലീഗിൽ തരം താഴ്ത്തൽ മേഖലയ്ക്കു തൊട്ടടുത്തു നിൽക്കുന്ന കാഡിസിനെതിരെ എതിരില്ലാത്ത ഒരു ഗോളിനാണ് ബാഴ്സലോണ സ്വന്തം മൈതാനത്തു തോൽവി വഴങ്ങിയത്. 48-ാം മിനിറ്റിൽ ലൂക്കാസ് പെരസ് ആണ് കാ‍ഡിസിന്‍റെ ഗോൾ നേടിയത്.
തോൽവിയോടെ ലീഗിൽ 7 മത്സരങ്ങളുടെ വിജയ കുതിപ്പിനാണ് അവസാനമായത്. 75 ശതമാനം സമയവും ബാഴ്സലോണ പന്ത് കൈവശം വച്ച മത്സരത്തിൽ അവസരങ്ങൾ സൃഷ്‌ടിക്കുന്നതിൽ കാഡിസ് ബാഴ്‌സലോണക്ക് അത്ര പിന്നിൽ ആയിരുന്നില്ല. പെഡ്രി, പിക്വ, അറോഹോ തുടങ്ങിയ താരങ്ങളില്ലാതെ ഇറങ്ങിയ ബാഴ്സലോണ മത്സരത്തിന്‍റെ ആദ്യ പകുതിയിൽ നിറം മങ്ങിയ പ്രകടനമാണ് പുറത്തെടുത്തത്.