ബർമിങ്‌ഹാം: കോമൺവെൽത്ത് ഗെയിംസിൽ പതിമൂന്നാം സ്വർണവും നാൽപ്പതാം മെഡലുമായി ഇന്ത്യ. ഗെയിംസിന്‍റെ എട്ടാം ദിനം മാത്രം പതിനാല് മെഡലുകൾ ആണ് ഇന്ത്യ സ്വന്തമാക്കിയത്. ടോക്കിയോ പാരലിമ്പിക്‌സിൽ വെള്ളി മെഡൽ നേടിയ ഭവിന പട്ടേലാണ് സ്വർണം നേടിയത്. പാര ടേബിൾ ടെന്നിസ് ക്ലാസ് 3-5 വിഭാഗം സിംഗിൾസിൽ ആണ് ഭവിന സ്വർണം സ്വന്തം പേരിൽ കുറിച്ചത്.
ഇന്ത്യയുടെ ചരിത്രത്തിലെ ആദ്യ പാര ടേബിൾ ടെന്നിസ് സ്വർണ മെഡൽ ആയിരുന്നു ഇത്. നൈജീരിയയുടെ ഇക്‌പെയോയിയെ നേരിട്ടുള്ള സെറ്റുകൾക്ക് തോൽപ്പിച്ചായിരുന്നു ഇന്ത്യൻ താരത്തിന്‍റെ സ്വർണ നേട്ടം. കടുത്ത പോരാട്ടം കണ്ട ആദ്യ സെറ്റ് 12-10 ന് ജയിച്ച ഭവിന രണ്ടാം സെറ്റ് 11-2 ന് അനായാസം നേടി. മൂന്നാം സെറ്റിലും പോരാട്ടം കണ്ടെങ്കിലും 11-9 ന് സെറ്റ് പിടിച്ച ഭവിന സ്വർണത്തിൽ മുത്തമിട്ടു.