ഇസ്‌താംബൂൾ:സ്‌പാനിഷ് വമ്പൻമാരായ ബാഴ്സലോണ യുവേഫ യൂറോപ്പ ലീഗ് ക്വാർട്ടറിലെത്തി. പ്രീക്വാർട്ടറിന്‍റെ രണ്ടാം പാദ മത്സരത്തിൽ തുർക്കി ക്ലബായ ഗലാറ്റസറെയെ 2-1ന് തോൽപ്പിച്ച് ആണ് ബാഴ്സലോണ ക്വാർട്ടർ ഉറപ്പിച്ചത്. ന്യുകാംപിൽ നടന്ന ആദ്യ പാദത്തിൽ ഇരുടീമുകളും ഗോൾ രഹിത സമനിലയിൽ പിരിഞ്ഞിരുന്നു.
ഇന്ന് തുർക്കിയിൽ സ്വന്തം ആരാധകർക്ക് മുന്നിൽ ഗംഭീരമായാണ് ഗലാറ്റസറെ തുടങ്ങിയത്. 28-ാം മിനുട്ടിലെ ബ്രസീലിയൻ താരം മാർക്കാവോയുടെ ഹെഡർ ഗോളിലൂടെ ഗലാറ്റസറെ മുന്നിലെത്തിയെങ്കിലും പെഡ്രി, ഒബാമയാങ് എന്നിവരിലൂടെ ബാഴ്സലോണ തിരിച്ചു വന്നു.
37-ാം മിനിട്ടിൽ പെനാൾട്ടി ബോക്‌സിനകത്ത് പ്രതിരോധ താരങ്ങളെ വെട്ടിയൊഴിഞ്ഞ് പെഡ്രിയാണ് ബാഴ്‌സക്കായി സമനില ഗോൾ കണ്ടെത്തിയത്. രണ്ടാം പകുതിയുടെ തുടക്കത്തിൽ ഡിജോങ്ങിന്‍റെ പാസിൽ നിന്നും ഒബാമയങ് ആണ് ബാഴ്‌സയുടെ വിജയ ഗോൾ നേടിയത്.