ബാഴ്‌സലോണ:സാവിക്ക് കീഴിൽ വിജയക്കുതിപ്പ് തുടർന്ന് ബാഴ്‌സലോണ. കരുത്തരായ സെവിയ്യയെ ഏകപക്ഷീയമായ ഒരു ഗോളിനാണ് വീഴ്ത്തിയത്. ജയത്തോടെ റയലിന് പിന്നിലായി ലീഗിൽ രണ്ടാമതെത്തി ബാഴ്‌സലോണ.
യുവതാരം പെഡ്രി നേടിയ ഗോളിലാണ് എതിരാളികളെ ബാഴ്‌സ മുട്ടുകുത്തിച്ചത്. സീസണിന്‍റെ തുടക്കത്തിൽ ലീഗിൽ താളം കണ്ടെത്താൻ ബുദ്ധിമുട്ടിയ ബാഴ്‌സ, ലീഗിൽ തുടർച്ചയായി നേടുന്ന ആറാം ജയമാണിത്. 2022-ൽ ഒമ്പത് മത്സരങ്ങൾ കളിച്ച സാവിയുടെ സംഘം ഇതുവരെ തോൽവിയറിഞ്ഞിട്ടില്ല.
രാജ്യാന്തര മത്സരങ്ങൾക്കായുള്ള ഇടവേളക്കു മുമ്പ് എൽ ക്ലാസിക്കോയിൽ റയൽ മാഡ്രിഡിനെ നാലു ഗോളിന് തകർത്ത ആത്മവിശ്വാസത്തിലിറങ്ങിയ ബാഴ്‌സയ്ക്ക് അവരുടെ തട്ടകത്തിൽ കടുത്ത പ്രതിരോധമാണ് സെവിയ്യ ഉയർത്തിയത്. ആദ്യപകുതിയിൽ ഒന്നിലേറ തവണ ആതിഥേയർ ഗോളിനടുത്തെത്തിയെങ്കിലും സെവിയ്യ ഗോൾകീപ്പർ വിലങ്ങുതടിയായി.