ലോകകപ്പിന് മുന്നോടിയായി വെയിൽസ് കടുത്ത അടവുകൾ പഠിക്കണം : ബെയ്‌ല്‍

നെതർലാൻഡ്‌സിനെതിരായ തോൽവിക്ക് പിന്നാലെയാണ് ബെയ്‌ല്‍ വെയിൽസിന്‍റെ ശൈലിയെക്കുറിച്ച് വ്യക്‌തമാക്കിയത്

കാർഡിഫ് : യുവേഫ നാഷൻസ് ലീഗിൽ നെതർലാൻഡ്‌സിനെതിരായി തോൽവി വഴങ്ങിയതിന് പിന്നാലെ ലോകകപ്പിന് മുന്നോടിയായി വെയിൽസ് കടുത്ത അടവുകൾ പഠിക്കണമെന്ന നിർദേശവുമായി നായകൻ ഗാരത് ബെയ്‌ൽ. ഇഞ്ച്വറി ടൈമിൽ ഗോൾ വഴങ്ങിയ മത്സരത്തിൽ ഒന്നിനെതിരെ രണ്ട് ഗോളുകൾക്കായിരുന്നു വെയിൽസിന്‍റെ തോൽവി. നെതർലാൻഡ്‌സിനോടും തോൽവി വഴങ്ങിയതോടെ യുവേഫ നാഷൻസ് ലീഗിലെ കളിച്ച രണ്ട് മത്സരങ്ങളിലും വെയിൽസ്‌ പരാജയപ്പെട്ടു.

കൂപ്മെയിനെർസിന്‍റെ ഗോളിൽ അൻപതാം മിനിറ്റിൽ തന്നെ മുന്നിലെത്തിയ നെതർലാൻഡ്‌സിനെതിരെ 92-ാം മിനിറ്റിൽ നോറിങ്റ്റൻ ഡേവിസിലൂടെ വെയിൽസ്‌ സമനില പിടിച്ചെങ്കിലും തൊട്ടടുത്ത മിനിട്ടിൽ വോട്ട് വെഗ്ഹോർസ്റ്റിന്‍റെ ഗോളിലൂടെ നെതർലാൻഡ്‌സ് വിജയത്തിലെത്തി. ഇതിന് പിന്നാലെയാണ് ടീം കടുത്ത അടവുകൾ പ്രയോഗിക്കണമെന്ന നിർദേശവുമായി ബെയ്‌ൽ എത്തിയത്.

'ഞങ്ങളുടെ ഏറ്റവും മികച്ച സ്‌ക്വാഡ് ഇല്ലാത്തതിനാൽ തന്നെ ഇത് ബുദ്ധിമുട്ടേറിയ മത്സരമായിരുന്നു. എന്നാൽ കളത്തിലിറങ്ങിയ താരങ്ങൾ കഠിനാധ്വാനം ചെയ്‌തു. സമനില ഗോൾ നേടുകയും അതിനുപിന്നാലെ ഗോൾ വഴങ്ങുകയും ചെയ്യുന്നത് നിരാശ നൽകുന്നതാണ്. ഞങ്ങൾ, ഡി ജോങ്ങിനെ ഫൗൾ ചെയ്യാൻ കടുത്ത അടവുകൾ അറിഞ്ഞിരിക്കണമായിരുന്നു. ലോകകപ്പിൽ ഇത് സംഭവിച്ചാൽ എന്ത് ചെയ്യണമോ, അതുതന്നെ ചെയ്യണം' - ബെയ്‌ൽ മത്സരശേഷം പറഞ്ഞു.

യുക്രൈനെ ലോകകപ്പ് യോഗ്യത പ്ലേ ഓഫിൽ തോൽപ്പിച്ച് ഖത്തർ ലോകകപ്പിൽ സ്ഥാനം നേടാൻ അവർക്ക് കഴിഞ്ഞിരുന്നു. 64 വർഷങ്ങൾക്കുശേഷമാണ് വെയിൽസ് ലോകകപ്പ് യോഗ്യത നേടുന്നത്. 1958ലാണ് വെയിൽസ് അവസാനമായി ലോകകപ്പ് കളിച്ചത്.