AUSTRALIAN OPEN: ഇന്ത്യൻ സ്വപ്‌നങ്ങൾ അവസാനിച്ചു, സാനിയ മിർസ-രാജീവ് റാം സഖ്യം ക്വാർട്ടറിൽ പുറത്ത്

ഓസ്ട്രേലിയൻ സഖ്യത്തോട് നേരിട്ടുള്ള സെറ്റുകൾക്കാണ് ഇന്ത്യൻ സഖ്യം തോൽവി വഴങ്ങിയത്.

മെൽബണ്‍: ഓസ്ട്രേലിയൻ ഓപ്പണ്‍ മിക്‌സഡ് ഡബിൾസ് ക്വാർട്ടറിൽ ഇന്ത്യയുടെ സാനിയ മിർസ രാജീവ് റാം സഖ്യം തോൽവിയോടെ പുറത്ത്. ഓസ്ട്രേലിയയുടെ ജെയ്‌മി ഫോർലിസ്-ജെയ്‌സൺ കുബ്‌ലർ സഖ്യത്തോട് നേരിട്ടുള്ള സെറ്റുകൾക്കാണ് ഇന്ത്യൻ സഖ്യം അടിയറവ് പറഞ്ഞത്. സ്കോർ 4-6, 6-7.

ഒരു മണിക്കൂർ 30 മിനിട്ട് നീണ്ട പോരാട്ടത്തിനൊടുവിലാണ് ഇന്ത്യൻ സഖ്യം തോൽവി സമ്മതിച്ചത്. അദ്യസെറ്റ് ഓസീസ് സഖ്യം അനായാസം സ്വന്തമാക്കി. എന്നാൽ രണ്ടാം സെറ്റിൽ ഇന്ത്യൻ സഖ്യം ശക്‌തമായി ചെറുത്ത് നിന്നെങ്കിലും വിജയം സ്വന്തമാക്കാനായില്ല.

വനിത ഡബിൾസിൽ താരം നേരത്തെ തന്നെ പുറത്തായിരുന്നു. അതേസമയം ഈ സീസണിൽ ടെന്നിസ് കോർട്ടിനോട് വിടപറയും എന്ന് പ്രഖ്യാപിച്ച സാനിയയുടെ അവസാന ഓസ്ട്രേലിയൻ ഓപ്പണ്‍ ആണിത്. ഗ്രാന്‍റ്സ്ലാം നേടുന്ന ആദ്യ ഇന്ത്യൻ വനിത കൂടിയാണ് 35കാരിയായ സാനിയ.