ജക്കാര്‍ത്ത: ഏഷ്യ കപ്പ് ഹോക്കിയില്‍ ഇന്ത്യയ്‌ക്ക് വെങ്കലം. ജപ്പാനെതിരായ മത്സരത്തില്‍ ഏകപക്ഷീയമായ ഒരു ഗോളിന് ജയിച്ചാണ് ഇന്ത്യയുടെ മെഡല്‍ നേട്ടം. രാജ് കുമാർ പാലാണ് ഇന്ത്യയുടെ വിജയ ഗോള്‍ നേടിയത്.
മത്സരത്തിന്‍റെ ഏഴാം മിനിട്ടില്‍ പിറന്ന ഗോളിന് ഉത്തം സിങ്ങാണ് വഴിയൊരുക്കിയത്. മറുപടി ഗോളിന് ജപ്പാന്‍ നിരന്തരം ശ്രമങ്ങള്‍ നടത്തിയെങ്കിലും ഇന്ത്യന്‍ പ്രതിരോധം ഉലയാതെ നിന്നു. നേരത്തെ സൂപ്പര്‍ ഫോറിലെ അവസാന മത്സരത്തില്‍ ദക്ഷിണ കൊറിയയോട് സമനില വഴങ്ങിയതാണ് ടൂര്‍ണമെന്‍റിന്‍റെ ഫൈനലെന്ന ഇന്ത്യയുടെ പ്രതീക്ഷകള്‍ക്ക് തിരിച്ചടിയായത്.
നാല് ഗോളുകള്‍ വീതം നേടിയാണ് ഇരു സംഘവും സമനിലയില്‍ പിരിഞ്ഞത്. സഞ്‌ജീത്, രാജ് കുമാര്‍ പാല്‍, ശേഷ ഗൗഡ, മാരീശ്വരൻ ശക്തിവേൽ എന്നിവരാണ് ഇന്ത്യയ്‌ക്കായി ലക്ഷ്യം കണ്ടത്.