'പാരിസിലും ഇന്ത്യൻ ഗോൾവല കാക്കണം'; അടുത്ത ഒളിമ്പിക്‌സിലും പങ്കെടുക്കണമെന്ന് പിആർ ശ്രീജേഷ്

ശ്രീജേഷിന്‍റെ മികവിലാണ് 41 വർഷത്തിന് ശേഷം ഇന്ത്യ ഒളിമ്പിക്‌സിൽ ഒരു മെഡൽ സ്വന്തമാക്കിയത്.

ന്യൂഡൽഹി :2024 ലെ പാരിസ് ഒളിമ്പിക്‌സിൽ പങ്കെടുക്കാൻ താൽപര്യമുണ്ടെങ്കിലും ടീമിലുണ്ടാകുമോ എന്നത് തന്‍റെ ഫിറ്റ്നസിനേയും പ്രകടനത്തേയും ആശ്രയിച്ചിരിക്കുമെന്ന് ഇന്ത്യൻ ഹോക്കി ടീം ഗോൾകീപ്പറും മലയാളിയുമായ പിആർ ശ്രീജേഷ്. ടോക്കിയോ ഒളിമ്പിക്‌സിലെ പ്രകടനത്തിന്‍റെ അടിസ്ഥാനത്തിൽ മികച്ച ഗോൾകീപ്പർക്കുള്ള ഇന്‍റർനാഷണൽ ഹോക്കി ഫെഡറേഷന്‍റെ അവാർഡ് കരസ്ഥമാക്കിയതിന് ശേഷമുള്ള ചടങ്ങിൽ സംസാരിക്കുകയായിരുന്നു ശ്രീജേഷ്.

'ഒരു കളിക്കാരനും ഒളിമ്പിക്‌സിൽ പങ്കെടുക്കണ്ട എന്ന് പറയില്ല. ഞങ്ങൾ അത്യാഗ്രഹികളാണ്. എപ്പോഴും കഠിനാധ്വാനം ചെയ്യുകയും മികച്ചത് നൽകുകയും ചെയ്യുക എന്നതാണ് ഞങ്ങളുടെ പ്രധാന ലക്ഷ്യം. എന്‍റെ ടീം അംഗങ്ങൾ എന്നെ പുറത്താക്കാത്ത കാലത്തോളം ഇന്ത്യക്കായി കളിക്കാൻ ഞാൻ ആഗ്രഹിക്കുന്നു', ശ്രീജേഷ് പറഞ്ഞു.

'എനിക്ക് 21 വർഷത്തെ കരിയർ ഉണ്ട്‌. എന്നാൽ ഒരു കായികതാരത്തിന്‍റെ ജീവിതത്തിൽ ഒന്നും ഉറപ്പിച്ച് പറയാൻ സാധിക്കില്ല. പരിക്ക് സംഭവിക്കാം, പ്രകടനം കുറയാം, മറ്റുള്ളവർ നമ്മെക്കാൾ മികച്ച രീതിയിൽ കളിച്ചേക്കാം. ഇതെല്ലാം കായിക മേഖലയുടെ ഭാഗമാണ്, എന്നിരുന്നാലും ഒരു ഒളിമ്പിക്‌സിൽ കൂടി പങ്കെടുക്കണമെന്നാണ് ആഗ്രഹം', ശ്രീജേഷ് കൂട്ടിച്ചേർത്തു.

അതേ സമയം ശ്രീജേഷ് പാരീസിലും ടീമിനൊപ്പമുണ്ടാകുമെന്ന് ഇന്ത്യൻ നായകൻ മൻപ്രീത് സിങ് പറഞ്ഞു. ' അദ്ദേഹം ഞങ്ങളോടൊപ്പം പാരീസിലും ഉണ്ടാകും. ശ്രീജേഷ് മികച്ച ഗോൾ കീപ്പറാണ്. അതിനാൽ തന്നെ ഗോൾവല കാക്കാൻ അദ്ദേഹവുമുണ്ടാകണമെന്ന് ഞങ്ങൾ ആഗ്രഹിക്കുന്നുണ്ട്. ഞങ്ങൾക്ക് അവനിൽ വിശ്വാസമുണ്ട്. എന്നിരുന്നാലും ശാരീരിക ക്ഷമതയേയും മറ്റ് കാര്യങ്ങളേയും ആശ്രയിച്ചാകും ഭാവി കാര്യങ്ങൾ', മൻദീപ് പറഞ്ഞു.

ശ്രീജേഷിന്‍റെ സഹതാരങ്ങളായ രൂപീന്ദർ പാൽ സിങ്, ബീരേന്ദ്ര ലക്ര, എസ്‌വി സുനിൽ എന്നിവർ ഒളിമ്പിക്‌സിന് പിന്നാലെ വിരമിച്ചിരുന്നു. അതേസമയം ടോക്കിയോ ഒളിമ്പിക്‌സിൽ ഇന്ത്യക്ക് വിജയങ്ങൾ നേടിക്കൊടുക്കുന്നതിൽ ഏറ്റവും മികച്ച സംഭാവന നൽകിയത് ശ്രീജേഷ് ആയിരുന്നു. ശ്രീജേഷിന്‍റെ അവസാന നിമിഷത്തെ സേവ് ആയിരുന്നു ടോക്കിയോയിൽ ഇന്ത്യക്ക് വെങ്കലം നേടിത്തന്നത്.