ന്യൂഡല്‍ഹി: കഴിഞ്ഞ അഞ്ച് വർഷത്തിനിടെ പുരുഷ ഹോക്കി ടീമുകള്‍ക്കായി കേന്ദ്ര സർക്കാർ 65 കോടി രൂപ ചിലവഴിച്ചതായി കായിക മന്ത്രി അനുരാഗ് താക്കൂർ വ്യാഴാഴ്ച അറിയിച്ചു. രാജ്യ സഭയെയാണ് കേന്ദ്രമന്ത്രി ഇക്കാര്യം രേഖാമൂലം അറിയിച്ചത്. പരിശീലന ക്യാമ്പുകൾ, മത്സരങ്ങൾക്കും മറ്റ് ചിലവുകൾക്കുമായാണ് തുക വിനിയോഗിച്ചതെന്നും മന്ത്രി വ്യക്തമാക്കി.
” സീനിയർ ഹോക്കി പുരുഷ ടീമിന് 45.05 കോടി രൂപയും ജൂനിയർ ഹോക്കി പുരുഷ ടീമിന് 20.23 കോടി രൂപയുമാണ് നല്‍കിയത്. പരിശീലന ക്യാമ്പുകൾ, വിദേശ മത്സരങ്ങൾ, ആഭ്യന്തര മത്സരങ്ങൾ, പരിശീലകരുടെ ശമ്പളം, ഉപകരണങ്ങൾ തുടങ്ങിയവയ്ക്കായാണ് കഴിഞ്ഞ അഞ്ച് വർഷത്തിനിടെ (2016-17 മുതൽ 2020-21) തുക ചിലവഴിച്ചത്” കായിക മന്ത്രി രാജ്യ സഭയെ അറിയിച്ചു.