അണ്ടര്‍-20 ഫുട്‌ബോള്‍ ലോകകപ്പ് ഫൈനലിൽ ദക്ഷിണ കൊറിയയെ തകർത്ത് ഉക്രൈന് കിരീടം. ദക്ഷിണ കൊറിയയെ ഒന്നിനെതിരെ മൂന്ന് ഗോളുകൾക്ക് പരാജയപ്പെടുത്തിയാണ് ഉക്രൈന്‍റെ ആദ്യ കിരീടനേട്ടം.
അണ്ടർ 20 ഫുട്ബോൾ ലോകകപ്പിൽ ദക്ഷിണ കൊറിയയെ കീഴടക്കി ഉക്രൈന് കിരീടം - ദക്ഷിണ കൊറിയ
ഒരു ഗോളിന് പിന്നിൽ നിന്ന ശേഷം മൂന്ന് ഗോളുകൾ തിരിച്ചടിച്ചാണ് ഉക്രൈന്‍റെ കിരീട നേട്ടം
ഉക്രൈൻ
കളിയുടെ അഞ്ചാം മിനിറ്റിൽ തന്നെ ദക്ഷിണ കൊറിയ ഗോൾ നേടി മുന്നിലെത്തി. അഞ്ചാം മിനിറ്റിൽ ലഭിച്ച പെനാൽറ്റി ഗോളാക്കി മാറ്റി ലീ കാങ് ഇനാണ് കൊറിയക്ക് ലീഡ് നേടിക്കൊടുത്തത്. എന്നാൽ അവിടെ തളരാതിരുന്ന ഉക്രൈന്‍റെ യുവനിര ഗംഭീര തിരിച്ചുവരവാണ് നടത്തിയത്. 33-ാം മിനിറ്റില്‍ വ്ലാഡിസ്ലാവ് സുപ്രിയഹയിലൂടെ സമനില പിടിച്ച് ഉക്രൈൻ ആദ്യപകുതി അവസാനിപ്പിച്ചു.
രണ്ടാം പകുതിയിൽ ഇരുടീമും തകർപ്പൻ പ്രകടനമാണ് പുറത്തെടുത്തത്. 52-ാം മിനിറ്റിൽ തന്‍റെ രണ്ടാം ഗോളും നേടി സുപ്രിയഹ ഉക്രൈനെ മുന്നിലെത്തിച്ചു. അവിടുന്ന് സമനിലക്ക് വേണ്ടി കൊറിയയുടെ മുന്നേറ്റങ്ങളായിരുന്നു. പന്ത് കൈവശം വെക്കുന്നതിൽ കൊറിയ മിടുക്ക് കാണിച്ചെങ്കിലും ഫിനിഷിംഗിലെ പോരായ്മകൾ തിരിച്ചടിയായി. 89-ാം മിനിറ്റിൽ ഹ്വൊർഹി സിതായ്ഷ്വെലി മൂന്നാം ഗോളും നേടി ഉക്രൈന്‍റെ ജയമുറപ്പിക്കുകയായിരുന്നു. സെമിയിൽ ഇറ്റലിയെ തോല്‍പ്പിച്ചായിരുന്നു ഉക്രൈന് കലാശപ്പോരാട്ടത്തിന് തയ്യാറായത്. അവരുടെ ആദ്യ അണ്ടര്‍-20 ലോകകപ്പ് കിരീട നേട്ടം കൂടിയാണിത്.