പാരീസ്: യുവേഫ ചാമ്പ്യന്‍സ് ലീഗ് പ്രീ ക്വാര്‍ട്ടറില്‍ ഇനി വമ്പന്‍ പോരാട്ടം. പിഎസ്‌ജി ഹോം ഗ്രൗണ്ടില്‍ നടക്കുന്ന പതിനാറാം റൗണ്ടിലെ രണ്ടാം പാദത്തില്‍ ബാഴ്‌സലോണയെ നേരിടും. നേരത്തെ നൗ കാമ്പില്‍ നടന്ന ആദ്യപാദത്തില്‍ കിലിയന്‍ എംബാപ്പെയുടെ ഹാട്രിക് മികവില്‍ ഒന്നിനെതിരെ നാല് ഗോളുകള്‍ക്ക് പിഎസ്‌ജി വിജയിച്ചിരുന്നു. ഇന്ന് വലിയ മാര്‍ജിനിലില്‍ ജയിച്ചാലെ ബാഴ്‌സലോണയുടെ ക്വാര്‍ട്ടര്‍ പ്രതീക്ഷകള്‍ നിലനില്‍ക്കു.
പരിക്ക് കാരണം ആദ്യപാദത്തില്‍ കളിക്കാതിരുന്ന നെയ്‌മര്‍ കളിക്കാതിരുന്നത് മാത്രമാണ് ബാഴ്‌സയുടെ ഏക ആശ്വാസം. ലപ്പോര്‍ട്ട പ്രസിഡന്‍റായി തെരഞ്ഞെടുക്കപ്പെട്ട ശേഷമുള്ള ആദ്യ മത്സരമാണിന്ന് ബാഴ്‌സലോണ കളിക്കുക. സൂപ്പര്‍ ഫോര്‍വേഡ്‌ ലയണല്‍ മെസിയുടെ സാന്നിധ്യത്തില്‍ ബാഴ്‌സയുടെ ക്വാര്‍ട്ടര്‍ പ്രതീക്ഷകള്‍ ശക്തമാകുമെന്ന കണക്കുകൂട്ടലിലാണ് പരിശീലകന്‍ റൊണാള്‍ഡ് കോമാന്‍.
നെയ്‌മറില്ലെങ്കിലും ആദ്യപാദത്തിലെ വമ്പന്‍ ലീഡ് നിലനിര്‍ത്താനുള്ള ഒരുക്കങ്ങളെല്ലാം അര്‍ജന്‍റീനന്‍ പരിശീലകന്‍ പൊച്ചെറ്റീന്യോയുടെ നേതൃത്വത്തില്‍ പിഎസ്‌ജി നടത്തിക്കഴിഞ്ഞു. ഡി മരിയ പരിക്ക് മാറി ടീമില്‍ തിരിച്ചെത്തുന്നത് പിഎസ്‌ജിയുടെ കരുത്ത് വര്‍ധിപ്പിക്കും. എംബാപ്പെ, ഇക്കാര്‍ഡി, വെരാറ്റി തുടങ്ങിയവരും പിഎസ്‌ജിയുടെ മുന്നേറ്റങ്ങള്‍ക്ക് കരുത്ത് പകരും. കഴിഞ്ഞ തവണ ഫൈനലില്‍ ജര്‍മന്‍ കരുത്തരായ ബയേണ്‍ മ്യൂണിക്കിന് മുന്നില്‍ തകര്‍ന്നടിഞ്ഞ പ്രഥമ ചാമ്പ്യന്‍സ് ലീഗ് കിരീടമെന്ന സ്വപ്‌നം ഇത്തവണ പൊച്ചെറ്റീന്യോയിലൂടെ യാഥാര്‍ഥ്യമാക്കാനാണ് പിഎസ്‌ജിയുടെ നീക്കം.