ബാഴ്‌സലോണ: നൗ കാമ്പില്‍ നടന്ന യുവേഫാ ചാമ്പ്യന്‍സ് ലീഗ് പോരാട്ടത്തില്‍ ഫ്രഞ്ച് ഫോര്‍വേഡ് കിലിയന്‍ എംബാപ്പെയുടെ ഹാട്രിക് കരുത്തില്‍ പിഎസ്‌ജിക്ക് വമ്പന്‍ ജയം. ബാഴ്‌സലോണയെ ഒന്നിനെതിരെ നാല് ഗോളുകള്‍ക്കാണ് ഫ്രഞ്ച് കരുത്തരായ പിഎസ്‌ജി പരാജയപ്പെടുത്തിയത്. പരിക്കേറ്റ ബ്രസീലിയന്‍ ഫോര്‍വേഡ് നെയ്‌മറുടെ അഭാവത്തില്‍ എംബാപ്പെയെ മുന്‍നിര്‍ത്തിയാണ് പിഎസ്‌ജി ബാഴ്‌സയുടെ ഹോം ഗ്രൗണ്ടില്‍ മുന്നേറിയത്.
ആദ്യപകുതിയില്‍ ബാഴ്‌സലോണയുടെ വല കുലുക്കിയ എംബാപ്പെയിലൂടെ പിഎസ്‌ജി വരവറിയിച്ചപ്പോള്‍ രണ്ടാംപകുതി അവര്‍ തങ്ങളുടേത് മാത്രമാക്കി. എംബാപ്പെയുടെ തുടര്‍ന്നുള്ള രണ്ട് ഗോളുകളും രണ്ടാം പകുതിയിലാണ് പിറന്നത്. അടുത്തിടെ പിഎസ്‌ജിയില്‍ എത്തിയ ഇറ്റാലിയന്‍ മുന്നേറ്റ താരം മോയിസ് കിയാനും രണ്ടാം പകുതിയില്‍ പന്ത് വലയിലെത്തിച്ചു.