പനാജി: നോർത്ത് ഈസ്റ്റ് യുണൈറ്റഡിന്‍റെ പ്രതിരോധ നിരയെ പ്രശംസിച്ച് എഫ്‌സി ഗോവയുടെ പരിശീലകന്‍ സെര്‍ജിയോ ലൊബേറ. സന്ദർശകരുടെ പ്രതിരോധത്തില്‍ വിള്ളല്‍ വരുത്താന്‍ ഏറെ പരിശ്രമിക്കേണ്ടിവന്നെന്ന് പോസ്‌റ്റ് മാച്ച് സെഷനില്‍ അദ്ദേഹം പറഞ്ഞു. മത്സരത്തില്‍ നോർത്ത് ഈസ്‌റ്റിനെ ഏകപക്ഷീയമായ രണ്ട് ഗോളുകൾക്ക് ഗോവ പരാജയപ്പെടുത്തിയിരുന്നു. ഫൈനല്‍ വിസില്‍ മുഴങ്ങുമ്പോൾ ഏറ്റവും പ്രധാനപ്പെട്ട മൂന്ന് പോയിന്‍റുകൾ ഞങ്ങൾ സ്വന്തമാക്കി. ഇപ്പോൾ പോയിന്‍റ് പട്ടികയില്‍ ഞങ്ങൾ ഒന്നാമതാണ്. നോർത്ത് ഈസ്‌റ്റിന്‍റെ മുന്നേറ്റ താരം അസമാവോ ഗ്യാനിന്‍റെ അഭാവം കളിയില്‍ പ്രകടമായിരുന്നു.
എടികെക്ക് എതിരെയുള്ള അടുത്ത മത്സരം നിർണായകമാണ്. മത്സരത്തിനായി 10 ദിവസം ശേഷിക്കുന്നുണ്ട്. ലീഗിലെ ഈ സീസണില്‍ കൊല്‍ക്കത്ത ശക്തമായ നിലയിലാണ്. മികച്ച കളിക്കാരുള്ള അവർ നല്ലൊരു ടീമിനെ വാർത്തെടുത്തിട്ടുണ്ട്. നല്ലൊരു മത്സരം സാൾട്ട് ലേക്കില്‍ പ്രതീക്ഷിക്കാം. പക്ഷേ ഞാന്‍ ഗോവയുടെ ടീമില്‍ വിശ്വസിക്കുന്നു, ഞങ്ങൾക്ക് വിജയം ഉറപ്പാണെന്നും സെര്‍ജിയോ ലൊബേറ പറഞ്ഞു.