റോം: കൊവിഡ് 19ന് ശേഷം സീരി എയില്‍ തുടര്‍ച്ചയായി യുവന്‍റസിനായി ബൂട്ടുകെട്ടിയ ക്രിസ്റ്റ്യാനോ റൊണാള്‍ഡോക്ക് സീസണിലെ അവസാന മത്സരത്തില്‍ വിശ്രമം അനുവദിച്ചേക്കും. ഞായറാഴ്‌ച പുലര്‍ച്ചെ ഹോം ഗ്രൗണ്ടില്‍ റോമയുമായാണ് മത്സരം.
തുടര്‍ച്ചായി ഒമ്പതാം തവണയും യുവന്‍റസ് കിരീടം ഉറപ്പാക്കിയ സാഹചര്യത്തിലാണ് പോര്‍ച്ചുഗീസ് സൂപ്പര്‍ താരത്തിന് വിശ്രമം അനുവദിക്കാന്‍ പരിശീലകന്‍ മൗറിസിയോ സാരി തീരുമാനിച്ചതെന്നാണ് സൂചന. ഓഗസ്റ്റ് എട്ടാം തീയതി ചാമ്പ്യന്‍സ് ലീഗ് പ്രീ ക്വാര്‍ട്ടര്‍ മത്സരം നടക്കാനിരിക്കുന്ന പശ്ചാത്തലത്തില്‍ കൂടിയാണ് ഈ നീക്കം. ചാമ്പ്യൻസ് ലീഗില്‍ ലിയോണാണ് യുവെയുടെ എതിരാളികള്‍. നേരത്ത ആദ്യ പാദ പ്രീ ക്വാര്‍ട്ടറില്‍ ലിയോണ്‍ ഏകപക്ഷീയമായ ഒരു ഗോളിന് യുവന്‍റസിനെ പരാജയപ്പെടുത്തിയിരുന്നു.