മാഞ്ചെസ്റ്റർ : വിഖ്യാതമായ 7-ാം നമ്പർ ജേഴ്‌സി റൊണാൾഡോക്ക് തന്നെ നൽകി മാഞ്ചെസ്റ്റർ യുണൈറ്റഡ്. യുണൈറ്റഡിന്‍റെ മുന്നേറ്റതാരം എഡിന്‍സണ്‍ കവാനി 7-ാം നമ്പര്‍ വിട്ടുകൊടുക്കാന്‍ തയ്യാറായതോടെയാണ് റൊണാൾഡോയെത്തേടി തന്‍റെ ഭാഗ്യ നമ്പർ വീണ്ടുമെത്തുന്നത്.
റൊണാൾഡോ യുണൈറ്റഡിലേക്ക് തിരിച്ചെത്തിയതോടെ ഏഴാം നമ്പർ അദ്ദേഹത്തിന് നൽകണമെന്ന് ആവശ്യപ്പെട്ട് ആരാധകർ പ്രശ്നങ്ങൾ സൃഷ്ടിച്ചിരുന്നു. തുടർന്ന് ഒട്ടേറെ നിയമക്കുരുക്ക് ഉണ്ടായിരുന്നെങ്കിലും പ്രിമിയർ ലീഗ് അധികൃതരെ സമീപിച്ച് പ്രത്യേക അനുവാദം വാങ്ങിയാണ് യുണൈറ്റഡ് 7-ാം നമ്പർ റോണാൾഡോയ്‌ക്ക് നൽകിയത്.
2003ൽ പോർച്ചുഗൽ ക്ലബ് സ്പോർട്ടിങ് ലിസ്ബണിൽ നിന്ന് യുണൈറ്റഡിലെത്തിയപ്പോൾ റൊണാൾഡോ ആവശ്യപ്പെട്ടത് 28–ാം നമ്പർ ജഴ്സിയായിരുന്നു. എന്നാൽ അന്ന് ക്ലബ് താരത്തിന് നൽകിയത് ജോർജ് ബെസ്റ്റ്, എറിക് കാന്‍റണ, ഡേവിഡ് ബെക്കാം എന്നിവർ അനശ്വരമാക്കിയ ഏഴാം നമ്പർ ജേഴ്‌സിയായിരുന്നു. തുടർന്നങ്ങോട്ട് സി.ആർ 7 എന്നത് ഒരു ബ്രാൻഡ് ആയി തന്നെ മാറുകയായിരുന്നു.