ലണ്ടന്‍: മാഞ്ചസ്റ്റര്‍ യുണൈറ്റഡിന്‍റെ ഏഴാം നമ്പര്‍ ജേഴ്‌സിയുടെ ഉടമസ്ഥന്‍ എഡിസന്‍ കവാനിക്ക് മൂന്ന് മത്സരങ്ങളില്‍ വിലക്ക്. മാഞ്ചസ്റ്റര്‍ യുണൈറ്റഡ് ആരാധകന് സാമൂഹ്യമാധ്യമത്തിലൂടെ വംശീയാധിക്ഷേപം ഉള്‍ക്കൊള്ളുന്ന മറുപടി നല്‍കിയതിനാണ് കവാനിയെ വിലക്കാന്‍ ഇംഗ്ലീഷ് ഫുട്‌ബോള്‍ അസോസിയേഷന്‍ തീരുമാനിച്ചത്. പോസ്റ്റ് വംശീയാധിക്ഷേപത്തിന്‍റെ പരിധിയില്‍ വരുമെന്ന് അസോസിയേഷന്‍ നേരത്തെ കണ്ടെത്തിയിരുന്നു. ഒരു ലക്ഷം പൗണ്ട് പിഴയൊടുക്കാനും അസോസിയേഷന്‍ യുറുഗ്വന്‍ താരം കവാനിയോട് നിര്‍ദ്ദേശിച്ചിരുന്നു.
സതാംപ്‌റ്റണ് എതിരെ നടന്ന എവേ മത്സരത്തിലെ ജയത്തിന് പിന്നാലെയാണ് കവാനിയുടെ വിവാദ പോസ്റ്റ്. മത്സരത്തില്‍ രണ്ട് ഗോളടിച്ച കവാനി യുണൈറ്റഡിന്‍റെ ജയത്തില്‍ നിര്‍ണായക പങ്ക് വഹിച്ചിരുന്നു. വിവാദമായതോടെ കവാനി പോസ്റ്റ് പിന്‍വലിച്ചിരുന്നു. ഈ സീസണിലാണ് മാഞ്ചസ്റ്റര്‍ സിറ്റിക്ക് ഏഴാം നമ്പര്‍ ജേഴ്‌സിക്ക് പുതിയ അവകാശിയുണ്ടായത്. കഴിഞ്ഞ സീസണില്‍ ഉടനീളം ഏഴാം നമ്പര്‍ ജേഴ്‌സിയില്ലാതെയാണ് യുണൈറ്റഡ് കളിച്ചത്. ഒരു കാലത്ത് ക്രിസ്റ്റ്യാനോ റൊണാള്‍ഡോയെ പോലുള്ള താരങ്ങള്‍ ഓള്‍ഡ് ട്രാഫോഡില്‍ തിളക്കമാര്‍ന്ന പ്രകടനങ്ങള്‍ കാഴ്‌ചവെച്ച ജേഴ്‌സിയാണ് യുണൈറ്റഡിന്‍റേത്.