ബാഴ്‌സലോണയുമായുള്ള 21 വർഷം നീണ്ട കരാർ അവസാനിപ്പിച്ചതിന് പിന്നാലെ കാൽപ്പന്തിന്‍റെ മിശിഹ ലയണൽ മെസി ഇനി ഏത് ക്ലബിലേക്ക് ചുവടുമാറും എന്നറിയാൻ ഫുട്ബോൾ ലോകം ആകാംക്ഷയോടെ കാത്തിരിക്കുകയാണ്. 13-ാം വയസിൽ ബാഴ്‌സയിലെത്തിയ മെസി തുടർന്നും ക്ലബിൽ കളിക്കുമെന്ന് ആരാധകർ വിശ്വസിച്ചിരുന്നെങ്കിലും സാമ്പത്തികവും സാങ്കേതികവുമായ പ്രശ്‌നങ്ങൾ കാരണം താരം കരാർ പുതുക്കാതെ ക്ലബ് വിടുകയായിരുന്നു.
ബാഴ്സ വിട്ട സാഹചര്യത്തിൽ മെസി ഇനി ഏത് ക്ലബിൽ കളിക്കുമെന്ന കാര്യത്തിൽ ഇതുവരെയും തീരുമാനമായിട്ടില്ല. മെസിയെപ്പോലൊരു താരത്തെ വൻ തുകമുടക്കി ടീമിലെത്തിക്കാൻ ഏത് ക്ലബാണ് രംഗത്തെത്തുക എന്നറിയാൻ ആകാംക്ഷയോടെ കാത്തിരിക്കുകയാണ് ലോകം. രണ്ട് ക്ലബുകൾക്കാണ് പ്രധാനമായും ഇതിൽ സാധ്യത കൽപ്പിക്കുന്നത്. ഫ്രഞ്ച് ക്ലബായ പി.എസ്.ജിക്കും ഇംഗ്ലീഷ് പ്രീമിയർ ലീഗ് ക്ലബായ മാഞ്ചസ്‌റ്റർ സിറ്റിക്കും. ഇതിൽ പി.എസ്.ജിക്കാണ് സാധ്യത ഏറെയുള്ളത്.
പി.എസ്.ജി
മുൻ ബാഴ്സ താരവും മെസിയുടെ ഏറ്റവുമടുത്ത സുഹൃത്തുമായ ബ്രസീലിയൻ താരം നെയ്‌മർ കളിക്കുന്ന ക്ലബാണ് പി.എസ്.ജി. കൂടാതെ അർജന്‍റീനയിൽ മെസിയുടെ സഹ കളിക്കാരൻ കൂടിയായ എയ്‌ഞ്ചൽ ഡി മരിയയും പി.എസ്.ജിയുടെ താരമാണ്. ഇത് കൂടാതെ തന്നെ മെസിയുടെ വരവ് ഉണ്ടാക്കുന്ന സാമ്പത്തിക ബാധ്യത താങ്ങാനും ഫ്രഞ്ച് ഭീമൻമാരായ പി.എസ്.ജിക്ക് സാധിക്കും.