എറണാകുളം : ഇന്ത്യൻ ഫുട്‌ബോൾ ടീം മുൻ നായകൻ ഒളിമ്പ്യൻ ഒ. ചന്ദ്രശേഖരന്‍റെ മൃതദേഹം സംസ്‌കരിച്ചു. പച്ചാളം പൊതുശ്മശാനത്തിലായിരുന്നു സംസ്‌കാരം.
വാർധക്യസഹജമായ അസുഖങ്ങളെ തുടർന്ന് കഴിഞ്ഞ ചൊവ്വാഴ്ച കൊച്ചിയിലെ വസതിയിലായിരുന്നു അദ്ദേഹത്തിന്‍റെ വിയോഗം.
വിദേശത്തുള്ള മക്കളുടെയും ബന്ധുക്കളുടെയും സൗകര്യാർഥമാണ് സംസ്‌കാരം രണ്ട് ദിവസത്തേക്ക് മാറ്റിയത്. അതേസമയം ഫുട്‌ബോൾ താരമെന്ന നിലയിൽ ലോകോത്തര നിലവാരത്തിലേക്ക് ഉയർന്ന, മലയാളിയെ സംസ്ഥാന സർക്കാർ പൂർണമായും അവഗണിച്ചെന്ന വിമര്‍ശനവുമുയര്‍ന്നു.
സംസ്കാര വേളയില്‍ സംസ്ഥാന ബഹുമതികള്‍ നൽകാതിരുന്നത് പ്രതിഷേധാർഹമാണെന്ന് കെ.ബാബു എം.എൽ.എ പറഞ്ഞു. കായിക വകുപ്പ് മന്ത്രിയോ, ജില്ലാ കളക്ടറോ ചടങ്ങിൽ പങ്കെടുക്കാത്തത് വലിയ അവഗണനയാണെന്നും എംഎല്‍എ കൂട്ടിച്ചേര്‍ത്തു.
1960ലെ റോം ഒളിമ്പിക്സിൽ മത്സരിച്ച ഇന്ത്യൻ ടീമില്‍ അംഗമായിരുന്നു അദ്ദേഹം. റോം ഒളിമ്പിക്സിൽ ഫുട്‌ബോൾ കളിച്ച ഇന്ത്യക്കാരിൽ ജീവിച്ചിരുന്ന അവസാന താരത്തെയാണ് ഒ.ചന്ദ്രശേഖരന്‍റെ വിയോഗത്തോടെ നഷ്‌ടമായത്. 1962 എഷ്യൻ ഗെയിംസിൽ സ്വർണം നേടിയ ടീമിലും അദ്ദേഹമുണ്ടായിരുന്നു.