ലീഗ് കപ്പില്‍ ഹാട്രിക്ക് തിളക്കവുമായി മാഞ്ചസ്റ്റർ സിറ്റി

20-ാം മിനിട്ടില്‍ സെർജിയോ അഗ്യൂറോ, 30-ാം മിനിട്ടില്‍ റോഡ്രി എന്നിവർ സിറ്റിക്കായി ഗോൾ നേടിയപ്പോൾ 41-ാം മിനിട്ടില്‍ എംവാന സമാട്ട ആസ്റ്റൺ വില്ലയുടെ ആശ്വാസ ഗോൾ നേടി.

ലണ്ടൻ; ഇംഗ്ലീഷ് ലീഗ് കപ്പ് കിരീടം മാഞ്ചസ്റ്റർ സിറ്റിക്ക്. ഫൈനലില്‍ ആസ്റ്റൺ വില്ലയെ ഒന്നിനെതിരെ രണ്ട് ഗോളുകൾക്ക് തോല്‍പ്പിച്ചാണ് സിറ്റിയുടെ കിരീട നേട്ടം. തുടർച്ചയായ മൂന്നാം തവണയാണ് മാഞ്ചസ്റ്റർ സിറ്റി ഇംഗ്ലീഷ് കപ്പില്‍ മുത്തമിടുന്നത്. സീസണില്‍ പ്രീമിയർ ലീഗ് കിരീടം ഏറെക്കുറെ കൈവിട്ട സിറ്റിക്കും പരിശീലകൻ പെപ് ഗാർഡിയോളയ്ക്കും ആശ്വാസം പകരുന്നതാണ് ഇംഗ്ലീഷ് കപ്പ് കിരീട നേട്ടം.

20-ാം മിനിട്ടില്‍ സെർജിയോ അഗ്യൂറോ, 30-ാം മിനിട്ടില്‍ റോഡ്രി എന്നിവർ സിറ്റിക്കായി ഗോൾ നേടിയപ്പോൾ 41-ാം മിനിട്ടില്‍ എംവാന സമാട്ട ആസ്റ്റൺ വില്ലയുടെ ആശ്വാസ ഗോൾ നേടി. 1980- 84 കാലഘട്ടത്തില്‍ തുടർച്ചയായി നാല് തവണ ലീഗ് കപ്പ് സ്വന്തമാക്കിയ ലിവർപൂളാണ് ഇതിനു മുൻപ് മൂന്നോ അതില്‍ കൂടുതലോ തവണ തുടർച്ചയായി കിരീടം സ്വന്തമാക്കിയിട്ടുള്ളത്. സിറ്റിയുടെ ഏഴാം ലീഗ് കപ്പ് കിരീടം കൂടിയാണിത്.