ക്രിസ്റ്റ്യാനോയുടെ റെക്കോഡ് മറികടന്ന് മെസി

സ്‌പാനിഷ് ലാലിഗയില്‍ മല്ലോർക്കയെ രണ്ടിനെതിരെ അഞ്ച് ഗോളുകൾക്ക് ബാഴ്‌സലോണ തോല്‍പിച്ചു. മത്സരത്തില്‍ ഹാട്രിക്ക് ഗോൾ നേടിയ മെസിക്ക് റെക്കോര്‍ഡ്

ബാഴ്‌സലോണ: സ്പാനിഷ് ലാലിഗയില്‍ ക്രിസ്റ്റ്യാനോ റൊണാൾഡോയുടെ റെക്കോഡ് മറികടന്ന് ലയണല്‍ മെസി. ഏറ്റവും കൂടുതല്‍ ഹാട്രിക്ക് ഗോൾ നേടുന്ന താരമെന്ന റെക്കോഡാണ് മെസി സ്വന്തമാക്കിയത്. നൗക്യാമ്പില്‍ ആർസിഡി മല്ലോർക്കയ്ക്ക് എതിരായ മത്സരത്തിലാണ് ബാഴ്‌സലോണക്കായി മെസി തന്‍റെ മുപ്പത്തിയഞ്ചാമത്തെ ഹാട്രിക്ക് ഗോൾ സ്വന്തമാക്കിയത്. പോര്‍ച്ചുഗീസ് താരം ക്രിസ്റ്റ്യാനോ റൊണാൾഡോക്ക് 34 ഹാട്രിക്കുകളാണ് സ്വന്തമായിട്ടുള്ളത്.

മല്ലോർക്കക്കെതിരായ മത്സരത്തില്‍ ബാഴ്‌സലോണ രണ്ടിനെതിരെ അഞ്ച് ഗോളുകൾക്ക് വിജയിച്ചു. 17-ാം മിനിറ്റിലും 41-ാം മിനിറ്റിലും 83-ാം മിനിറ്റിലുമാണ് മെസിയുടെ ഗോളുകൾ പിറന്നത്. മത്സരത്തിന്‍റെ തുടക്കത്തില്‍ ഏഴാം മിനിറ്റില്‍ ഗ്രീസ്‌മാനാണ് ഗോൾ വേട്ടക്ക് തുടക്കം കുറിച്ചത്. 43-ാം മിനിറ്റില്‍ സുവാരിസും ബാഴ്‌സക്കായി ഗോൾ നേടി.

മുന്നേറ്റതാരം ബുദിമർ മല്ലോർക്കക്കായി ഇരട്ട ഗോളുകൾ നേടി. 35-ാം മിനിറ്റിലും 64-ാം മിനിറ്റിലുമാണ് ബാഴ്സയുടെ വല ബുദിമർ ചലിപ്പിച്ചത്. 15 മത്സരങ്ങളില്‍ നിന്ന് 34 പോയിന്‍റുമായി ബാഴ്‌സലോണ നിലവില്‍ ലീഗില്‍ ഒന്നാം സ്ഥാനത്താണ്. അതേസമയം ഗോൾ ശരാശരിയില്‍ പിന്നിലുള്ള റിയല്‍ മാഡ്രിഡ് 34 പോയിന്‍റുമായി രണ്ടാം സ്ഥാനത്തുണ്ട്.