ഇറ്റലി : ക്രിസ്റ്റ്യാനോ റൊണാൾഡോ ക്ലബ് വിട്ടശേഷം ആദ്യ മത്സരത്തിനിറങ്ങിയ യുവന്‍റസിന് തോൽവി. ഇറ്റാലിയൻ സിരി എ യിൽ ദുർബലരായ എംപോളിയാണ് കരുത്തരായ യുവന്‍റസിനെ അട്ടിമറിച്ചത്. എതിരില്ലാത്ത ഒരു ഗോളിനായിരുന്നു എംപോളിയുടെ വിജയം.
21-ാം മിനിട്ടില്‍ ലിയോണാര്‍ഡോ മാന്‍ക്യൂസോയാണ് എംപോളിയുടെ വിജയഗോള്‍ നേടിയത്. റോണാൾഡോക്ക് പകരം ഡിബാലയും ഫെഡറിക്ക് കിയേസയ്ക്കുമാണ് യുവന്‍റസിന്‍റെ ആക്രമണം ഏറ്റെടുത്തത്. എന്നാൽ ഇരുവർക്കും കാര്യമായി ഒന്നും ചെയ്യാനായില്ല.
ലീഗിൽ രണ്ട് മത്സരങ്ങൾ പൂർത്തിയായപ്പോൾ യുവന്‍റസിന് ഒരു വിജയം പോലും നേടാനായിട്ടില്ല. ഈ തോൽവിയോടെ സിരി എ യിൽ യുവന്‍റസ് 13-ാം സ്ഥാനത്തേക്ക് വീണു.