മഡ്‌ഗാവ്‌ : ഇന്ത്യൻ സൂപ്പർ ലീഗിൽ(ISL) കേരള ബ്ലാസ്റ്റേഴ്‌സ്- ഈസ്റ്റ് ബംഗാൾ മത്സരം സമനിലയിൽ. മത്സരത്തിൽ ഇരുടീമുകളും ഓരോ ഗോളുകൾ വീതം നേടി. ഈസ്റ്റ് ബംഗാളിനായി ടോമിസ്ലാവ് മർസെല ഗോൾ നേടിയപ്പോൾ ബ്ലാസ്റ്റേഴ്‌സിനായി അൽവാരോ വാസ്‌ക്വസ് സമനില ഗോൾ നേടി.
മത്സരത്തിന്‍റെ ആദ്യ ഘട്ടം മുതൽ ആക്രമണത്തോടെയാണ് ബ്ലാസ്റ്റേഴ്‌സ് പന്തുതട്ടിയത്. പിന്നാലെ 15-ാം മിനിട്ടിൽ അൽവാരോ പന്ത് ഈസ്റ്റ് ബംഗാളിന്‍റെ വലയിലെത്തിച്ചെങ്കിലും റഫറി ഈ ഗോൾ പിൻവലിച്ചു.
ഹാള്‍റിങ്ങിന്‍റെ ഷോട്ട് ഈസ്റ്റ് ബംഗാള്‍ താരം അമര്‍ജിത് കിയാമിന്‍റെ കൈയിലിടിച്ച് വാസ്‌ക്വസിന്‍റെ അരികിലെത്തി. പിന്നാലെ താരം പന്ത് വലയിലെത്തിച്ചു. എന്നാൽ ഇതിനിടെ റഫറി വിസിൽ മുഴക്കിയിരുന്നു. ബ്ലാസ്റ്റേഴ്‌സ് താരങ്ങളുടെ അപ്പീൽ റഫറി ആദ്യം പരിഗണിച്ചെങ്കിലും ഈസ്റ്റ് ബംഗാൾ താരങ്ങൾ വാദിച്ചതോടെ റഫറി ഗോൾ പിൻവലിക്കുകയായിരുന്നു.