ബംബോലി:ഇന്ത്യന്‍ സൂപ്പര്‍ ലീഗില്‍ കരുത്തരായ ബെംഗളൂരു എഫ്.സിയെ എതിരില്ലാത്ത ഒരു ഗോളിന് കീഴടക്കി ഹൈദരാബാദ് എഫ്.സി. ബര്‍ത്തലോമ്യു ഒഗ്‌ബെച്ചെയാണ് ടീമിനായി വിജയഗോള്‍ നേടിയത്. വിജയത്തോടെ ഹൈദരാബാദ് പോയന്‍റെ പട്ടികയില്‍ മൂന്നാം സ്ഥാനത്തേക്ക് കുതിച്ചു. ഹൈദരാബാദിന്‍റെ സൗവിക് ചൗധരി ഹീറോ ഓഫ് ദ മാച്ച് പുരസ്‌കാരം സ്വന്തമാക്കി.
സുനില്‍ ഛേത്രിയടക്കമുള്ള മുന്നേറ്റനിരയുണ്ടായിട്ടും മികച്ച പ്രകടനം പുറത്തെടുക്കാൻ സാധിക്കാത്തതാണ് ബെംഗളൂരുവിന്‍റെ തോൽവിക്ക് കാരണം. മത്സരത്തിന്‍റെ ആദ്യഘട്ടം മുതൽ ആക്രമിച്ചാണ് ഹൈദരാബാദ് കളിച്ചത്. പിന്നാലെ ഏഴാം മിനിട്ടിൽ ബര്‍ത്തലോമ്യു ഒഗ്‌ബെച്ചെയിലൂടെ ഹൈദരാബാദ് ലീഡ് സ്വന്തമാക്കി.