ഹൈദരാബാദ്: ഐഎസ്എല്ലില്‍ ആവസാന സ്ഥാനക്കാരായ ഹൈദരാബാദ് എഫ്‌സിയെ തകർത്ത് ചെന്നൈയിന്‍ എഫ്‌സി. ഒന്നിനെതിരെ മൂന്ന് ഗോളുകൾക്കാണ് ചെന്നൈയിന്‍ ഹൈദരാബാദിനെ പരാജയപെടുത്തിയത്.
ഹൈദരാബാദിന്‍റെ ഹോം ഗ്രൗണ്ടില്‍ നടന്ന മത്സരത്തില്‍ മുന്നേറ്റ താരം നെരിജസ് വാല്‍സ്‌കിസ് ഇരട്ട ഗോളുമായി തിളങ്ങി. ആദ്യ പകുതിയില്‍ 43-ാം മിനുട്ടിലും 65-ാം മിനുട്ടിലുമാണ് വാല്‍സ്‌കിസ് ഗോൾ നേടിയത്. മധ്യനിര താരം റീഫേല്‍ ക്രിവല്ലാരോയാണ് ചെന്നൈയിന്‍റെ ഗോൾ വേട്ടക്ക് തുടക്കമിട്ടത്. 40-ാം മിനുട്ടിലാണ് ക്രിവാല്ലരോ ഹൈദരാബാദിന്‍റെ വല ചലിപ്പിച്ചത്. മാർസലോ പെരിറ ഹൈദരാബാദിനായി ആശ്വാസ ഗോൾ നേടി.
ലീഗിലെ ചെന്നൈയിന്‍റെ മൂന്നാമത്തെ ജയമാണ് ഇത്. മത്സരത്തില്‍ ജയിച്ചതോടെ ചെന്നൈയിന്‍ ലീഗിലെ പോയിന്‍റ് പട്ടികയില്‍ രണ്ട് സ്ഥാനം മെച്ചപെടുത്തി ഏഴാമതായി. നിലവില്‍ 11 മത്സരങ്ങളില്‍ നിന്നായി 12 പോയിന്‍റാണ് ചെന്നൈയിനുള്ളത്. അവസാന സ്ഥാനത്തുള്ള ഹൈദരാബാദ് എഫ്‌സിക്ക് 12 മത്സരങ്ങളില്‍ നിന്നും അഞ്ച് പോയിന്‍റ് മാത്രമാണ് ഉള്ളത്. 12 മത്സരങ്ങളില്‍ നിന്നും 24 പോയിന്‍റുമായി എഫ്‌സി ഗോവയാണ് പോയിന്‍റ് പട്ടികയില്‍ ഒന്നാമത്.
ജനുവരി 16-ന് നടക്കുന്ന ലീഗിലെ അടുത്ത മത്സരത്തില്‍ ചെന്നൈയിന്‍ നോർത്ത് ഈസ്‌റ്റ് യുണൈറ്റഡിനെ നേരിടും. അവസാന സ്ഥാനക്കാരായ ഹൈദരാബാദ് എഫ്‌സി ജനുവരി 15-ന് നടക്കുന്ന അടുത്ത മത്സരത്തില്‍ ഒഡീഷാ എഫ്‌സിയെ നേരിടും.
