പനാജി:ഇന്ത്യന്‍ സൂപ്പര്‍ ലീഗില്‍ ഇന്ന് എടികെ മോഹന്‍ബഗാന്‍, ഒഡീഷ എഫ്‌സി പോരാട്ടം. രാത്രി 7.30ന് ഗോവയിലെ ഫെത്തോര്‍ഡാ സ്റ്റേഡിയത്തിലാണ് മത്സരം. ലീഗില്‍ ആദ്യ ജയം തേടി ഇറങ്ങുന്ന ഒഡീഷക്ക് നിലവിലെ ചാമ്പ്യന്‍മാരായ എടികെയെ നേരിടുക വെല്ലുവിളിയാകും. കളിച്ച രണ്ട് മത്സരങ്ങളും ജയിച്ച എടികെ മികച്ച ഫോമിലാണ്.
ലീഗിലെ ഉദ്‌ഘാടന മത്സരത്തില്‍ കേരളാ ബ്ലാസ്റ്റേഴ്‌സിനെയും പിന്നാലെ ഈസ്റ്റ് ബംഗാളിനെയും മുട്ടുകുത്തിച്ചാണ് എടികെയുടെ കുതിപ്പ്. രണ്ട് മത്സരങ്ങളിലും ക്ലിന്‍ഷീറ്റ് സ്വന്തമാക്കാനും എടികെക്ക് സാധിച്ചു. സന്ദേശ് ജിങ്കന്‍റെ നേതൃത്വത്തിലുള്ള എടികെയുടെ പ്രതിരോധം ഇത്തവണ ശക്തമാണ്. കഴിഞ്ഞ രണ്ട് മത്സരങ്ങളിലും ഇത് കാണാനും സാധിച്ചു. തുടര്‍ ജയങ്ങളാണ് എടികെ ലക്ഷ്യമിടുന്നതെന്ന് പരിശീലകന്‍ അന്‍റോണിയോ ലോപ്പസ് ഹെബ്ബാസ് ഇതിനകം വ്യക്തമാക്കി കഴിഞ്ഞു.