ഭുവനേശ്വര്‍: ഐഎസ്എല്ലില്‍ തുടർച്ചയായ മൂന്നാമത്തെ മത്സരത്തിലും വിജയിച്ച് ഒഡീഷാ എഫ്‌സി പോയിന്‍റ് പട്ടികയില്‍ നാലാം സ്ഥാനത്ത്. ഹോം ഗ്രൗണ്ടില്‍ നടന്ന മത്സരത്തില്‍ ഓഡീഷ മറുപടിയില്ലാത്ത രണ്ട് ഗോളുകൾക്ക് മുംബൈയെ പരാജയപ്പെടുത്തി. 47-ാം മിനുറ്റില്‍ അരിഡാനെയും 74-ാം മിനുറ്റില്‍ ഹെര്‍ണാണ്ടസുമാണ് മുംബൈയുടെ വല ചലിപ്പിച്ചത്.
ഇരു ടീമുകൾക്കും ആദ്യ പകുതിയില്‍ നിരവധി അവസരങ്ങൾ ലഭിച്ചെങ്കിലും ഒന്നും വലയിലെത്തിക്കാനായില്ല. ലീഗിലെ ഈ സീസണില്‍ ഒഡീഷയുടെ അഞ്ചാമത്തെ ജയമാണ് ഇത്. 12 മത്സരങ്ങളില്‍ നിന്നായി 18 പോയിന്‍റാണ് ഓഡീഷക്കുള്ളത്. മത്സരത്തില്‍ തോറ്റെങ്കിലും 16 പോയിന്‍റുമായി മുംബൈ പട്ടികയില്‍ അഞ്ചാം സ്ഥാനത്താണ്. 24 പോയിന്‍റുമായി ഗോവ എഫ്‌സി ഒന്നാം സ്ഥാനത്തും 22 പോയിന്‍റുമായി ബംഗളൂരു രണ്ടാം സ്ഥാനത്തുമാണ്.