ലണ്ടന്‍ :ബിഗ്‌ബെന്നിലെ നാഴികമണികളുടെ ചലനങ്ങള്‍ക്കൊപ്പം കാല്‍പന്തിന്‍റെ ലോകം ലണ്ടന്‍ നഗരത്തിലെ വിംബ്ലിയിലേക്ക് ചുരുങ്ങുകയാണ്. ഇംഗ്ലണ്ടിലെ വിഖ്യാതമായ സ്റ്റേഡിയത്തില്‍ യൂറോപ്യന്‍ രാജാക്കാന്‍മാരുടെ കിരീടധാരണത്തിന് ഇനി ദിവസങ്ങള്‍ മാത്രം ബാക്കി. സെമി ഫൈനല്‍ പോരാട്ടങ്ങള്‍ക്ക് ബുധനാഴ്‌ച പുലര്‍ച്ചെ കിക്കോഫാകും.
യൂറോയുടെ ഈ സീസണില്‍ ഏറ്റവും കൂടുതല്‍ ഗോളടിച്ച രണ്ട് ടീമുകള്‍ തമ്മിലാണ് ആദ്യ സെമി. 32 മത്സരങ്ങളില്‍ പരാജയമറിയാതെ മുന്നേറുന്ന ഇറ്റലിയും യൂറോയില്‍ ഏറ്റവും കൂടുതല്‍ കിരീടങ്ങളെന്ന നേട്ടം ലക്ഷ്യമിടുന്ന സ്‌പെയിനും. ഗോളുകളുടെ എണ്ണത്തില്‍ ടേബിള്‍ ടോപ്പര്‍ സ്‌പെയിനാണ്. സ്‌പാനിഷ് നിര 12ഉം രണ്ടാം സ്ഥാനത്തുള്ള ഇറ്റലിക്ക് 11ഉം ഗോളുകളാണ് അടിച്ചുകൂട്ടിയത്.
കണക്കുകള്‍ പരിശോധിക്കുമ്പോള്‍ വിംബ്ലിയിലെ ആദ്യ സെമിയില്‍ പിറക്കുന്ന ഗോളുകളുടെ എണ്ണം കണക്കൂകൂട്ടലുകള്‍ക്ക് അപ്പുറത്തേക്ക് പോയേക്കാം. യൂറോയുടെ ചരിത്രത്തില്‍ ഏറ്റവും കൂടുതല്‍ ഗോളുകള്‍ പിറന്നത് ഈ സീസണിലാണ്. 135 ഗോളുകളാണ് ഇതേവരെ വലയിലെത്തിയത്. കഴിഞ്ഞ തവണത്തെ 108 ഗോളുകളെന്ന റെക്കോഡ് മറികടന്ന് ടൂര്‍ണമെന്‍റിലെ ഗോളുകളുടെ എണ്ണം മുന്നേറുകയാണ്.
പരാജയമറിയാതെ ഇറ്റലി
ഇറ്റാലിയന്‍ ഫുട്‌ബോള്‍ ചരിത്രത്തില്‍ ആദ്യമായി 32 മത്സരങ്ങളില്‍ പരാജയമറിയാതെ മുന്നോട്ട് നീങ്ങുന്ന മാന്‍സിനിയുടെ ശിഷ്യന്‍മാര്‍ ജയത്തില്‍ കുറഞ്ഞൊന്നും ആഗ്രഹിക്കുന്നില്ല. 4-3-3 ഫോര്‍മേഷനാണ് മാന്‍സിനി ഇതേവരെ പ്രയോഗിച്ചത്. ഇമ്മൊബൈലും കിയേസയും ഇന്‍സൈനും ചേരുന്ന മുന്നേറ്റം ഉള്‍പ്പെടെ അസൂറിപ്പട എല്ലാ മേഖലയിലും എതിരാളികളെ വെള്ളം കുടിപ്പിച്ചാണ് തേരോട്ടം നടത്തുന്നത്.
ക്വാര്‍ട്ടറില്‍ റൊമേലു ലുക്കാക്കു ഉള്‍പ്പെടുന്ന ലോക ഒന്നാം നമ്പറായ ബെല്‍ജിയത്തിന്‍റെ മുന്നേറ്റത്തെ വരെ അവര്‍ ടാക്കിള്‍ ചെയ്‌ത് വിജയിച്ചു. ഇത്തവണ ഇറ്റലി നേരിട്ടവരില്‍ ഏറ്റവും മികച്ച ടീമായിരുന്നു ബെല്‍ജിയം.
അവസാന നാലിലേക്കുള്ള പോരാട്ടത്തില്‍ അക്കൗണ്ട് തുറക്കാന്‍ പോലും സാധിക്കാതെയാണ് റെഡ് ഡെവിള്‍സ് നാട്ടിലേക്ക് വണ്ടി കയറിയത്. സ്‌പെയിനെതിരെ സെമിയില്‍ ബൂട്ടുകെട്ടാന്‍ ഒരുങ്ങുമ്പോള്‍ മാന്‍സിനിയുടെ തന്ത്രങ്ങള്‍ക്ക് മൂര്‍ച്ചകൂടും. 1968ന് ശേഷം യൂറോയില്‍ കപ്പടിക്കാന്‍ ഏറ്റവും കൂടുതല്‍ സാധ്യത കല്‍പ്പിക്കുന്ന ടീമുമായാണ് ഇറ്റാലിയന്‍ പരിശീലകന്‍ വിംബ്ലിയിലേക്ക് വണ്ടി കയറുന്നത്.
സെമിയില്‍ കാലിടറിയത് ഒരുതവണ മാത്രം
യൂറോ കപ്പിന്‍റെ സെമി ഫൈനലില്‍ ഒരു തവണ മാത്രമാണ് ഇറ്റലി പരാജയപ്പെട്ടത്. നാല് തവണ സെമി ഫൈനല്‍ യോഗ്യത നേടിയ ഇറ്റലിക്ക് 1988ല്‍ സോവിയറ്റ് യൂണിയന് മുന്നില്‍ പരാജയം വഴങ്ങേണ്ടി വന്നു. അന്ന് എതിരില്ലാത്ത രണ്ട് ഗോളുകള്‍ക്കാണ് അസൂറിപ്പട പരാജയപ്പെട്ടത്. ഇത്തവണ വിംബ്ലിയില്‍ സ്‌പെയിനെ പരാജയപ്പെടുത്തിയാല്‍ ഇറ്റലിക്കായി ഒരുതവണ കൂടി കപ്പുയര്‍ത്താനുള്ള അവസരമാണ് മാന്‍സിനിയുടെ ശിഷ്യന്‍മാര്‍ക്ക് ലഭിക്കുക.
Also Read: അസൂറിപ്പടയ്‌ക്കൊപ്പം സ്‌പിനസോളയില്ല ; പരിക്കിന്‍റെ പിടിയില്‍ ലെഫ്‌റ്റ് ബാക്ക്