ലണ്ടന്‍ :ഇംഗ്ലീഷ് പ്രീമിയര്‍ ലീഗിലെ കരുത്തൻമാരുടെ പോരാട്ടത്തില്‍ ചെല്‍സിയെ കീഴടക്കി നിലവിലെ ചാമ്പ്യന്മാരായ മാഞ്ചസ്റ്റര്‍ സിറ്റി. എതിരില്ലാത്ത ഒരു ഗോളിനാണ് വിജയം. 53-ാം മിനിട്ടില്‍ ബ്രസീല്‍ താരം ഗബ്രിയേല്‍ ജെസ്യൂസാണ് സിറ്റിയുടെ വിജയഗോൾ നേടിയത്. ഇതോടെ പ്രീമിയര്‍ ലീഗില്‍ പരാജയമറിയാതെയുള്ള ചെല്‍സിയുടെ കുതിപ്പിനാണ് സിറ്റി അവസാനം കുറിച്ചത്.
അതേസമയം മറ്റൊരു മത്സരത്തിൽ പരാജയമറിയാതെ മുന്നേറിയിരുന്ന മാഞ്ചസ്റ്റര്‍ യുണൈറ്റഡ് ആസ്റ്റണ്‍ വില്ലയോട് തോല്‍വി ഏറ്റുവാങ്ങി. എതിരില്ലാത്ത ഒരു ഗോളിനാണ് ആസ്റ്റണ്‍ വില്ലയുടെയും വിജയം. മത്സരമവസാനിക്കാന്‍ മിനിട്ടുകള്‍ മാത്രം ബാക്കിനില്‍ക്കെ 88-ാം മിനിട്ടില്‍ കോര്‍ട്‌നി ഹൗസാണ് വില്ലയ്ക്ക് വേണ്ടി ഗോള്‍ നേടിയത്.
വിജയത്തോടെ ആറുമത്സരങ്ങളില്‍ നിന്ന് 13 പോയിന്‍റുമായി മാഞ്ചസ്റ്റര്‍ സിറ്റി പോയിന്‍റ് പട്ടികയില്‍ രണ്ടാം സ്ഥാനത്തേക്ക് കുതിച്ചു. 13 പോയിന്‍റുള്ള ചെൽസി മൂന്നാം സ്ഥാനത്തും യുണൈറ്റഡ് നാലാം സ്ഥാനത്തുമാണ്. ചെല്‍സിയും യുണൈറ്റഡും തോറ്റതോടെ ലിവര്‍പൂള്‍ പോയിന്‍റ് പട്ടികയില്‍ ഒന്നാമത്തെത്തി.