ലണ്ടന്‍: ചെകുത്താന്‍മാരും ചെമ്പടയും കൊമ്പുകോര്‍ത്ത ആന്‍ഫീല്‍ഡ് പോരാട്ടം സമനിലയില്‍. മാഞ്ചസ്റ്റര്‍ യുണൈറ്റഡും നിലവിലെ ചാമ്പ്യന്‍മാരായ ലിവര്‍പൂളും നേര്‍ക്കുനേര്‍ വന്നപ്പോള്‍ ഗോള്‍രഹിത സമനിലയായിരുന്നു ഫലം. പന്തടക്കത്തിന്‍റെ കാര്യത്തിലും ഷോട്ടുകളുടെ കാര്യത്തിലും ലിവര്‍പൂള്‍ മുന്നില്‍ നിന്നപ്പോള്‍ ഗോളവസരങ്ങളുണ്ടാക്കുന്നതില്‍ ഇരുവരും ഒപ്പത്തിനൊപ്പമായിരുന്നു. ലിവര്‍പൂള്‍ മൂന്നും യുണൈറ്റഡ് നാലും ഷോട്ടുകള്‍ ഗോള്‍മുഖത്തേക്ക് തൊടുത്തു.
ഇരു ടീമുകളും ആക്രമിച്ച് കളിച്ച മത്സരത്തില്‍ നിര്‍ഭാഗ്യം കൊണ്ടാണ് ഗോളുകള്‍ മാറിനിന്നത്. രണ്ടാം പകുതിയില്‍ യുണൈറ്റഡിന്‍റെ ഫ്രഞ്ച് താരം പോള്‍ പോഗ്‌ബ തൊടുത്തുവിട്ട ഷോട്ട് ലിവര്‍പൂളിന്‍റെ വല കാത്ത അലിസണ്‍ ബെക്കര്‍ മനോഹരമായി തടുത്തിട്ടു. യുണൈറ്റഡ് മിഡ്‌ഫീല്‍ഡര്‍ ബ്രൂണോ ഫെര്‍ണാണ്ടസിന്‍റെ രണ്ട് ഷോട്ടുകളാണ് പാഴായി പോയത്. പോര്‍ച്ചുഗീസ് താരം ബ്രൂണോയുടെ മിന്നല്‍ ഷോട്ട് ലിവര്‍പൂളിന്‍റെ വല കാത്ത അലിസണ്‍ ബെക്കര്‍ തടുത്തിട്ടു. പിന്നാലെ ബ്രൂണോയുടെ ഫ്രീകിക്ക് ആതിഥേയരുടെ ഗോള്‍പോസ്റ്റിനെ ചുംബിച്ച് പുറത്തേക്ക് പോകുന്നതിനും ആന്‍ഫീല്‍ഡ് സാക്ഷിയായി. ആദ്യപകുതിയില്‍ ബോക്‌സിന് മുന്നിലായി റഫറി അനുവദിച്ച ഫ്രീക്ക് ബ്രൂണോ ഗോള്‍മുഖത്തേക്ക് തൊടുത്തെങ്കിലും ലക്ഷ്യം കണ്ടില്ല.