മാഡ്രിഡ്: ബയേണ്‍ മ്യൂണിക്കിന്‍റെ ഓസ്‌ട്രിയന്‍ പ്രതിരോധ താരം ഡേവിഡ് അലബയെ കൂടാരത്തിലെത്തിച്ച് സ്‌പാനിഷ് വമ്പന്‍മാരായ റയല്‍ മാഡ്രിഡ്. അടുത്ത അഞ്ച് സീസണുകളിലേക്കാണ് 28കാരനായ അലബയെ ബയേണ്‍ മ്യൂണിക്കില്‍ നിന്നും റയല്‍ സ്വന്തമാക്കിയത്. യൂറോ കപ്പിന് ശേഷം താരം റയലിനൊപ്പം ചേരും.
ക്യാപ്റ്റന്‍ സെർജിയോ റാമോസുമായുള്ള കരാര്‍ ജൂണില്‍ അവസാനിക്കാനിരിക്കെ കൂടിയാണ് ക്ലബിന്‍റെ പുതിയ നീക്കം. അതേസമയം കരാര്‍ അവസാനിക്കുന്ന സാഹചര്യത്തില്‍ ഈ സീസണ് ശേഷം ബയേണ്‍ വിടുമെന്ന് അലബ കഴിഞ്ഞ ഫെബ്രുവരിയില്‍ തന്നെ വ്യക്തമാക്കിയിരുന്നു. 13 വര്‍ഷമായി ബയേണിനൊപ്പമാണ് അലബയുള്ളത്.