'ഫൈനലിനെ നോക്കിക്കാണുന്നത് ആവേശത്തോടെ'; ഇറങ്ങുന്നത് ജയിക്കാനെന്ന് മെസി

'എപ്പോഴത്തേക്കാളും ആവേശത്തിലാണ് ഈ ഫൈനലിനെ നോക്കി കാണുന്നത്. രാജ്യത്തിനായി എല്ലായ്പ്പോഴും എന്‍റെ എല്ലാം നൽകിയിട്ടുണ്ട്'.

ബ്രസീലിയ:കോപ്പ അമേരിക്ക ഫുട്ബോള്‍ ടൂര്‍ണമെന്‍റിന്‍റെ ഫൈനലിലെത്തിയതിന് പിന്നാലെ ബ്രസീൽ താരം നെയ്മര്‍ക്ക് മറുപടിയുമായി ലയണൽ മെസി. ഫൈനലിൽ എല്ലാവരും ജയിക്കാൻ വേണ്ടിയാണ് ഇറങ്ങുന്നതെന്നും തങ്ങളും വിജയിക്കാനാവും ഇറങ്ങുകയെന്നുമാണ് മെസി പറഞ്ഞത്. കൊളംബിയക്കെതിരായ സെമി ഫൈനലിന് ശേഷം നടന്ന വാർത്താസമ്മേളനത്തിലായിരുന്നു താരത്തിന്‍റെ പ്രതികരണം.

ഫൈനലിൽ അർജന്‍റീനയെ നേരിടാനാണ് ആഗ്രഹമെന്നും ബ്രസീല്‍ മത്സരം പിടിക്കുമെന്നായിരുന്നു കഴിഞ്ഞ ദിവസം നെയ്മര്‍ പറഞ്ഞത്. അതേസമയം നെയ്മർ നല്ല കുട്ടിയായതുകൊണ്ടാണ് ഇങ്ങനെ പറഞ്ഞെതെന്നും മെസി പറഞ്ഞു. 'കഴിഞ്ഞ കോപ്പയിൽ പ്രയാസമുള്ള ഗ്രൂപ്പിലായിരുന്നു അർജന്‍റീന. എന്നിട്ടും പോസിറ്റീവായി കളിക്കാൻ കഴിഞ്ഞു.

ഇപ്രാവശ്യം ഫൈനലിലും എത്താനായി. എപ്പോഴത്തേക്കാളും ആവേശത്തിലാണ് ഈ ഫൈനലിനെ നോക്കി കാണുന്നത്. രാജ്യത്തിനായി എല്ലായെപ്പോഴും എന്‍റെ എല്ലാം നൽകിയിട്ടുണ്ട്. ഞാൻ ഫോമിലാണോ അല്ലയോ എന്നതിലല്ല കാര്യ'മെന്നും താരം പറഞ്ഞു.