ബ്രസീലിയ: കോപ്പ അമേരിക്ക ഫുട്‌ബോള്‍ ടൂര്‍ണമെന്‍റില്‍ പെറുവിനെ തകര്‍ത്ത കൊളംബിയക്ക് മൂന്നാം സ്ഥാനം. പെറുവിനെ രണ്ടിനെതിരെ മൂന്നു ഗോളുകള്‍ക്ക് തകര്‍ത്താണ് കൊളംബിയ മൂന്നാമതെത്തിയത്. ലൂയിസ് ഡിയാസിന്‍റെ ഇരട്ട ഗോളാണ് കൊളംബിയയ്ക്ക് വിജയമൊരുക്കിയത്. മത്സരത്തിന്‍റെ അധിക സമയത്തായിരുന്നു കൊളംബിയയുടെ വിജയ ഗോളും ഡിയാസിന്‍റെ രണ്ടാം ഗോളും പിറന്നത്.
മത്സരത്തിന്‍റെ ആദ്യ പകുതിക്ക് തൊട്ടുമുമ്പ് 45ാം മിനുട്ടില്‍ പെറുവാണ് ആദ്യം മുന്നിലെത്തിയത്. കുയെവയുടെ പാസില്‍ നിന്നും യോഷിമിര്‍ യോടുണുവാണ് ഗോള്‍ കണ്ടെത്തിയത്. തുടര്‍ന്ന് രണ്ടാം പകുതിയുടെ തുടക്കത്തില്‍ തന്നെ കൊളംബിയ ഒപ്പം പിടിച്ചു. 49-ാം മിനുട്ടില്‍ യുവാന്‍ ക്വഡ്രാഡോയാണ് ഫ്രീകിക്കിലൂടെ ലക്ഷ്യം കണ്ടത്. പിന്നാലെ 66ാം മിനുട്ടില്‍ ലൂയിസ് ഡിയാസിലൂടെ കൊളംബിയ മുന്നിലെത്തി.