റിയോ ഡിജനീറോ: കിരീടം നിലനിര്‍ത്താന്‍ അവസാന ആയുധവും രാകി മിനുക്കിയ കാനറികള്‍ ക്വാര്‍ട്ടര്‍ പോരാട്ടത്തിന്. കോപ്പ അമേരിക്കയുടെ സെമി ഫൈനലിലേക്ക് മാര്‍ച്ച് ചെയ്യാന്‍ ബ്രസീലിന് മുന്നിലെ കടമ്പ ചിലിയാണ്. ഗ്രൂപ്പ് ഘട്ടത്തില്‍ ഒരുതവണ പോലും പരാജയം അറിയാതെ മുന്നേറുന്ന ടിറ്റെയുടെ ശിഷ്യന്‍മാര്‍ക്ക് ചിലി വലിയ വെല്ലുവിളി ഉയര്‍ത്തിയേക്കില്ല. ബി ഗ്രൂപ്പില്‍ ഒരു തവണ മാത്രമാണ് ചിലി ജയം സ്വന്തമാക്കിയത്.
ഗ്രൂപ്പില്‍ നിന്നും നാലാം സ്ഥാനക്കാരായി ക്വാര്‍ട്ടറിലേക്കെത്തിയ മിഡ്‌ഫീല്‍ഡര്‍ അര്‍തുറോ വിദാലിനും കൂട്ടരും രണ്ട് തവണ സമനില വഴങ്ങി. പരിക്കില്‍ നിന്നും മുക്തനായ അലക്‌സ് സാഞ്ചസ് ബൂട്ട് കെട്ടുന്നത് മാത്രമാണ് പരിശീലകന്‍ മാര്‍ട്ടന്‍ ലസാര്‍ട്ടെക്കും ശിഷ്യന്‍മാര്‍ക്കും ആശ്വസിക്കാന്‍ വക നല്‍കുന്നത്. കോപ്പയില്‍ ഇതേവരെ സ്വന്തമാക്കിയ മൂന്ന് ഗോളുകളില്‍ രണ്ടും ഫോര്‍വേഡ് എഡ്വാര്‍ഡോ വര്‍ഗാസിന്‍റെ പേരിലാണ്. വര്‍ഗാസിന്‍റെ മുന്നേറ്റങ്ങളിലാണ് ചിലിയുടെ പ്രതീക്ഷ.
മറുഭാഗത്ത് മഞ്ഞപ്പടയുടെ ബെഞ്ച് സ്‌ട്രങ്ങ്‌ത്ത് പോലും പരിശീലകന്‍ ടിറ്റെ പരീക്ഷിച്ച് വിലയിരുത്തി കഴിഞ്ഞു. അളന്ന് മുറിച്ച നീക്കങ്ങളിലൂടെ കപ്പ് നിലനിര്‍ത്താമെന്ന പ്രതീക്ഷയിലാണ് അദ്ദേഹം. ടൂര്‍ണമെന്‍റില്‍ ഇതേവരെ 10 ഗോളുകള്‍ സ്വന്തമാക്കിയ കാനറികള്‍ ഗ്രൂപ്പ് ചാമ്പ്യന്‍മാരായാണ് ക്വാര്‍ട്ടറിലേക്ക് എത്തുന്നത്. ടീം വര്‍ക്കിലൂടെയാണ് ബ്രസീലിയന്‍ മുന്നേറ്റങ്ങള്‍.
രണ്ട് വീതം ഗോളുകളും അസിസ്റ്റുകളുമായി നെയ്‌മര്‍ കളം നിറയുമ്പോള്‍ ഒപ്പത്തിനൊപ്പം മുന്നേറുകയാണ് സഹതാരങ്ങള്‍. ഫോര്‍വേഡ് ഗബ്രിയേല്‍ ജസൂസും മിഡ്‌ഫീല്‍ഡര്‍മാരായ ഫ്രെഡും സോറസും ഉള്‍പ്പെടെ അസിസ്റ്റുകളുമായി കളം നിറയുന്നു. മത്സരം പുലര്‍ച്ചെ 5.30ന് ആരംഭിക്കും.