ബംഗളൂരു:ഇന്ത്യന്‍ സൂപ്പർ ലീഗില്‍ ഒഡീഷയുടെ വല നിറച്ച് ബംഗളൂരു എഫ്‌സി. ഹോം ഗ്രൗണ്ടില്‍ നടന്ന മത്സരത്തില്‍ ബംഗളൂരു എതിരില്ലാത്ത മൂന്ന് ഗോളുകൾക്ക് ഒഡീഷ എഫ്‌സിയെ തോല്‍പ്പിച്ചു. 23-ാം മിനിറ്റില്‍ ഡേഷോണ്‍ ബ്രൗണിലൂടെയാണ് ബംഗളൂരു ഗോള്‍വേട്ട തുടങ്ങിയത്. രണ്ട് മിനിറ്റുകൾക്കകം രാഹുല്‍ ബെക്കെ ബംഗലൂരുവിന്‍റെ ലീഡ് രണ്ടാക്കി ഉയര്‍ത്തി. രണ്ടാം പകുതിയിലായിരുന്നു മൂന്നാമത്തെ ഗോൾ. 61-ാം മിനിറ്റില്‍ നായകന്‍ സുനില്‍ ഛേത്രി പെനല്‍റ്റിയിലൂടെ സന്ദർശകരുടെ വല ചലിപ്പിച്ചു.
ഡെല്‍ഗാഡോ എടുത്ത കോര്‍ണര്‍ കിക്കില്‍ ഗ്യൂഡെസ് ബംഗലൂരുവിന്‍റെ പര്‍ത്താലുവിനെ ബോക്‌സില്‍ വീഴ്ത്തി. ഇതോടെ ബംഗലൂരുവിന് അനുകൂലമായി റഫറി പെനല്‍റ്റി വിധിക്കുകയായിരുന്നു. ജയത്തോടെ ഒഡീഷയുടെ വിജയ കുതിപ്പ് അവസാനിപ്പിക്കാനും ബംഗളൂരുവിനായി. ലീഗിലെ കഴിഞ്ഞ നാല് മത്സരങ്ങളില്‍ ഒഡീഷ തോല്‍വി അറിഞ്ഞിരുന്നില്ല.