ടൂറിന്‍: ചാമ്പ്യന്‍സ് ലീഗ് പ്രീ ക്വാർട്ടറില്‍ വീണ്ടും അട്ടമറി. വമ്പന്‍ ടീമുകളായ യുവന്‍റസും റയല്‍ മാഡ്രിഡിനും തോല്‍വി. ഇംഗ്ലീഷ് പ്രീമിയർ ലീഗിലെ കരുത്തരായ മാഞ്ചസ്റ്റർ സിറ്റിയോട് ഒന്നിനെതിരെ രണ്ട് ഗോളുകൾക്കാണ് റയല്‍ മാഡ്രിഡ് പരാജയപ്പെട്ടത്. റയലിന്‍റെ ഹോം ഗ്രൗണ്ടില്‍ നടന്ന മത്സരത്തില്‍ ആദ്യ പകുതി ഗോൾ രഹിതമായി അവസാനിച്ചു.
രണ്ടാം പകുതിയില്‍ 60-ാം മിനിട്ടില്‍ സ്പാനിഷ് സൂപ്പർ താരം ഇസ്കോയിലൂടെ റയലാണ് ആദ്യ ഗോൾ സ്വന്തമാക്കിയത്. 78-ാം മിനിട്ടില്‍ മുന്നേറ്റ താരം ഗബ്രിയേല്‍ ജീസസിലൂടെ മാഞ്ചസ്റ്റർ സിറ്റി സമനില പിടിച്ചു. അഞ്ച് മിനിട്ടിന് ശേഷം 83-ാം മിനിട്ടില്‍ കെവിന്‍ ഡി ബ്രൂണിയിയുടെ പെനാല്‍ട്ടിയിലൂടെ സിറ്റി വിജയ ഗോൾ നേടി. 86-ാം മിനിട്ടില്‍ സെർജിയോ റാമോസ് ചുവപ്പ് കാർഡ് കണ്ട് പുറത്ത് പോയതിനെ തുടർന്ന് 10 പേരുമായാണ് റയല്‍ മത്സരം പൂർത്തിയാക്കിയത്. ലീഗില്‍ ഇരു ടീമുകളും തമ്മിലുള്ള രണ്ടാം പാദ പ്രീക്വാർട്ടർ മത്സരം മാർച്ച് 18-ന് മാഞ്ചസ്റ്റർ സിറ്റിയുടെ ഹോം ഗ്രൗണ്ടായ എത്തിഹാദ് സ്റ്റേഡിയത്തില്‍ നടക്കും.